Mudirê qeyûmî polîs Uysaler rê 11 serre ceza ameye dayene

Polîs Ercan Uysaler o ke qeyûm o kerdbi mudir semedo ke vera xebatkaranê cinîyan zorîye kerde ke nê cinîyî fuhuş bikerê 11 serre cezaya zîndanî ci rê ameye dayene.

Roniştişo diyîn ê dewaya mudirê qeyûmî polîs Ercan Uysaler ame kerdene. Dima ke Şaredarîya Mêrdînî rê walî Msutafa Yaman sey qeyûm ame tayînkerdene polîs Ercan Uysaler ard Kent A.Ş. ser. Ercan Uysaler zorîye daye xebatkara cinîye D.S. ke fuhuş bikera. Uysaler tewrê mehkeme nêbi. D.S., zaf avûkatê û endamê Platformê Şahmaranî yê Mêrdînî tewrê mehkeme bîyî.

Her çiqas dewa dewayêka umûmîye bîye zî Wezaretê Polîtîkayanê Keyeyan û Sosyalan tewrê dewa nêbî.  Mehkeme eşkera kerd ke îfadeyê Uysalerî bi waştişê Mehkema Cezaya Eslî ya Çorumî ame girewtene.

D.S. vat: "4ê nîsane de wexto ke odaya arşîvî de bîye Uysaler ame cayê mi û mi rê teklîf kerd. Mi teklîfê ci qebul nêkerd. Wexto ke teklîfê xo dibare kerd mi rewşe keyeyê xo ra vat û keyeyê mi zî waşt ke ez kar ca biverda."

Heyetê mehkeme 6 serre ceza daye Uysaler. Mehkeme semedo ke ''Uysaler wezîfedarê umûmîye bî û karê xo bi hawayêkê xirabî xebitna'' cezaya ci zêdînaye kerde 9 serrî û reyna semedê giranîya çalakîye cezaya Uysalerî kerde 11 serr û 3 menge. Mehkeme bire daye ke polîs Ercan Uysaler bêro tepiştene.