Mehlaya Dêrto ya pabesteya qezaya Xalfetî ya Riha de roja 18’ê Gulane dimayê pêkewtişî ra qezayanê Xalfetî û Heweng de 47 kesî ameybî destbendkerdene. Înan ra heta nika 19 kesî ameyî veradayene, êyê bînî hewna nezaret de yê.

Birayî dimayo ke ameyî destbendkerdene ameyî berdene bi Qereqolê Cendirmeyan ê Yaylakî. Tîya pîya bi tayê kesanê bînan ê ke ameybî destbendkerdene destê înan pey ra kelemçekerde fek û rî ser erd ra ameyî dergkerdene, dima ra ameyî berdene bi Şûbeyê TEM’î yê Riha.

‘Elektrîk Dayî Organê Min ê Cinsîyî’

Ahmet Yildirimî nê vatî: “TEM’de înan elektrîk da ma. Gama ke înan ez hucra ra veta tewreyêkê sîyayî kerd sereyê mi ra. Dima ra ez kuwaya. Mi tu çî nêdîyêne. Çend kesan ez kuwayêne bewlî nêbi. Dima ra înan cilê mi vetî, ez kerda viran. Înan da mi ro û ez eşta erd. Dest û lingê mi girêdayî. Înan ez paştî ser kerda derg û elektrîk da organê min ê cinsîyî. Sereyê mi şikit. Şopê birîna sereyî hewna zî esta. Kîşta mi de Omer Gul zî estbi, înan ê rê zî zaf îşkence kerd.”

Yildirimî vat gama ke ê seba kontrolê weşîye ameyê berdene bi nêweşxane fek û zinca înan gonî mîyan de bîya, rixmê nê de zî doktoran tu mudaxeleyêk nêkerdo.

Tu Çîyêk ra Hayîya Ma Çinbî!

Muslum Yildirimo ke peyê goşê êyê rastî de 6 derzî estê û çaqê êyê rastî de morî esta bi çimanê tersayeyan qalê çîyanê ke nezaret de arîyayê înan sere kerd. Yildirimî vat îşkence û muameleyo xirab hewna ke ê keye de bîyê dest pêkerdo û vat, “Înan ma heme vetî teber, ma fek û rî ser erd ra kerdî derg. Dima ra ma rê îşkence kerd. Nengî çînayêne û heqaretî kerdêne. Bi dimê sîlehan dayêne ma ro. Înan me kuwayî. Dima ra zî ma berdî Şûbeyê TEM’î. Ma 6-7 rojî TEM de mendî. Tîya zî muameleyê xirabî û îşkenceyî dewam kerdî.”

Yildirimî vat ê hewna zî nêzanê ke çira ameyê destbendkerdene, la gama ke nezaret de bîyê asayîş de polîsan tim înan ra vato ‘şima bîyî sebeb ke yew embazê ma bimiro.’ Yildirimî vat hayîya înan tu çîyêk ra çinbîya û bi rojan îşkence bi ci bîyo.