Rêxistina HDP'yî ya Mêrdînî roja 36'ine ya Nobeta Demokrasîyî de çalakîya xo daye domnayene. Nobete de parlamentara HDP'yî ya Mêrdînî Ebru Gunaye vat ke şar pê gonîya çareyê xo şaredarîyî tepîya girewtî û ê do şaredarîyan qeyûman ra nêverdo.
Partîya Şaran a Demokratîke (HDP) ya Mêrdînî, verba tayînkerdişê qeyûmî 36 rojî ra nata Nobeta Demokrasîyî de ya.
Ewro ver Walîtîya Mêrdînî pêro çalakîyî ameyî qedexekerdene, verê despêkerdişê çalakîye bi seyan polîsan der û dorê bînaye girewt. Seba ke polîsan der û dorê bînaya HDP'yî girewt, îdarekar, endam û parlamenteranê HDP'yî bînaya HDP'yî de çalakîya xo rê dewam kerde.
Nobete de parlamentera HDP'yî ya Mêrdînî Ebru Gunay qisey kerd û ard ziwan ke ê do şaredarîyanê xo qeyûman ra nêverdê. Gunay wina vat: " Pê destê qeyûmî îradeyê Kurdan xesp kerd. Verba xespkerdişê îradeyê xo 36 rojî ma xo ver danê. Derheqê qeyûman de merdim eşkeno zaf çîyan vajo. La no zerrîya ma rehet nêkeno. Ma xespê qeyûman qebul nêkenî û îradeyê xo zî înan ra nêverdenê. Sîstemê ma Hemserekîye yo. No sîstem kewto destê qeyûman. Hemserekîye xeta ma ya mor a. Ma do verna nê xespî têkoşînê xo rê dewam bikê.‘‘ Çalakîye pê sloganan qedîyaye.
