Nobetê Edaletî yê ke çarçeweya hemleya ''Abdullah Ocalanî rê azadîye, meseleya kurdan rê çareserîya sîyasîye'' de Amed, Îstanbul, Wan, Adana, Mersin û  Mêrdîn de dîyayî destpêkerdene dewam kenê.

Amed de Nobeta Edaletî ya ke banê DEM Partî ya qezaya Rezanî de yene kerdene kewte roja 36ine. Çalakîya ke hetê xeylêk merdimanê tepitşeyan ra yena rayraberdene hetê partî û dezgehanê  kurdan ra ameye zîyaretkerdene. Çalakîwanî deyîrê kurdkî û slogana “Bijî berxwedana zindanan” vatî. Nobete bi deyîranê kurdkî, tîlîlî û sloganan dewam kerde.

Îstanbul de Nobeta Edaletî ya ke banê DEM Partî ya Esenlerî de yana kerdene,  roja 27ine de dewam kerde. Çalakwanan deyîrê kurdkî û sloganê sey “Bijî Serok Apo”, “Be Serok jiyan nabe”, “Bijî Berxwedana zindanan” vatî. Ciwananê ke çalakwanî zîyaret kerdî waştişê azadîya fîzîkîye ya Abdullah Ocalanî ard ziwan. Merdimanê tepişteyan ê ke nobete tepiştenê vat heta azadîya fîzîkîye ya Abdullah Ocalanî do têkoşîn bêro domnayene.

Reyna Wan, Mêrdîn, Adana û Mersin de zî çalakîyî dewam kenê. Çalakwanan semedê xurtkerdişê têkoşînî û wayîrvejîyayîşê tepişteyan veng da.