Tepişteyê dewaya PKK û PAJKî vera tecrîdê serê Rayberê Şarê Kurdî Abdullah Ocalanî û seba çareserîya meseleya kurdan 27ê teşrîna peyêne ra nata grevê vêşanîye de yê. Amed de zî seba paştdayîşê tepişteyan 4ê kanûne ra nata Nobeta Edaletî yena kerdene.

Dadîyanê Nobeta Edaletî derheqê çalakîya xo de ANFyî rê qisey kerd.

Dayîke Halîme Topuz vist vîrî ke şarê kurdî 25 serrî yo teyna azadîya Abdullah Ocalanî wazeno û vat: ''Wa berê Îmraliyî abibê û Rayberê ma azad bibo. Heta ke tecrîd nêqedo haştîye zî do nêra. No tecrîd vera xozaya ma, şarê ma, ziwan û kulturê ma zî yeno kerdene. Rayîrê haştîye Îmrali de yo. Erdogan wa şoro ê berî abikero û Birêz Ocalanî de qisey bikero.

Ma xatirê domananê xo yê tepişteyan û Rayber Apoyî ra tîya de yê.  Wa pêro dadî, hunermend, sîyaetmedar, nuştoxî bêrê tîya de ma reyde ronişê. Bêrê ma pîya nê tecrîdî bişiknê. Domanê ma hê grevê vêşanîye de yê.''

Dayîke Emîne Al vat: ''No tecrîd dişmenîya vera kurdan nîşan keno. Ma tîya de grevê vêşanîye nêkenê, nobeta edaletî de yê. Wa na bêedaletîya ke 25 serran o dewam kena biqeda. Tecrîdê vera Rayberîya ma vera ma pêroyînan yeno kerdene. Wa pêro dadîyî zî bêrê tewrê nobeta ma bibê. Wa bêrê vera nê tecrîdî vengê xo vejê. Ma tecrîdî qebul nêkenê. Ma do bi têkoşînê xo tecrîdî bişiknê. Tecrîd sûc o.''