Nobetê Edaletî yê ke semedê azadîya Rayberê Şarê Kurdî Abdullah Ocalanî Amed, Wan, Îstanbul, Îzmîr, Adana û Mersin de dîyayî destpêkerdene, dewam kenê. Çalakîyan de ame vatene ke semedê şiknayîşê tecrîdî ganî têkoşîn bêro xurtkerdene.

Amed de nobeta ke banê DEM Partî yê qezaya Rêzanî de serkêşîya TUAY-DERî de  yena kerdene, hetê xeylêk kesan ra ameye zîyaretkerdene.  Ewro Şirnexî ra Dayîkanê Haştîye, Hemşaredarê Silopî Suleyman Şavluk û îdarekarê DBP û DEM Partî yê Şirnex û qezayan çalakwanî zîyaret kerdî. Dima ra Hemsereka DEM Partî ya Amedî Pinare Sakik Tekin  çalakwanî zîyaret kerdî. Zîyaretkerdoxan ard ziwan ke ê paştî danê merdimanê tepişteyan û bale ante muhîmîya azadîya Abdullah Ocalanî ser.

Wan de wekîlanê DEM Partî yê bajarî Gulderene Varli û Zulkuf Uçarî û xeylêk kesan çalakwanê Nobeta Edaletî zîyaret kerdî. Çalakîye de slogana “Bijî berxwedana zindanan” ameye vatene.

Adana de zî Nobeta Edaletî aşmêke xo dima verdaye. Salona çalakîye de pankartê sey ''Tecrîd sûcê merdimîye yo'' û ''Ma semedê edaletî tecrîdî bişiknê, semedê haştîya demokrate bibê vegnê zîndanan'' ameyî daliqnayene. Çalakwanan vat mifteyê haştîye destê Abdullah Ocalanî de yo. Çalakîye de kurdkî deyîrî ameyî vatene.

Mersin de zî çalakîye roja 30ine de dewam kerde. Hemserekê
Çukurova TUAY-DERî Ergîn Altundaşî vat mesajê tepişteyanê ke 107 zîndanan de grevê vêşanîye de yê û çalakwananê Nobeta Edaletî zelal a. Altuntaşî reyna waştişê şiknayîşê tecrîdî û çareserkerdişê meseleya kurdan ard ziwan.

Îstanbul roja 21ine de nobete banê DEM Partî yê Esenlerî de dewam kerde. Çalakîye de sloganê sey “Biji berxwedana zindanan” , “Bijî Serok Apo” û “Jin jiyan azadî” ameyî vatene. Çalakwanan ra Kumrî Akgul ard ziwan ke çalakîya înan ganî hetê şaran ra dahîna zaf bêro wayîrvejîyayene û vat, ''Kam beno wa bibo ganî her kes bêro paştî bido ma. Ma dayîkan, merdimanê tepişteyan têna meverdê. Wa şarê ma wayîrê yewbînan bivejîyo. Ma bibê vengê zîndanan ke wa waştişê înan bêrê caardene. Ganî her kes têkoşînî xurt bikero.''