Hêzê îqtîdarî û asîmîlasyonî yê burjuvazî nêweşîyêka kanserî yê ke kewtê mîyanê komelî. Her kes eşkeno torra mabênê nêweşîyanê sey kanser û AIDSê û kanserê komelî fam bikero. Hobbes wexto ke hewcedarîya dewlete ya komelê kapîyalîstî dano şinasnayene na rewşe sey 'vergirewtişê yewbînkiştişanê merdiman' ercneno. No ercnayîşêko raşt o. Kapîtalîzm seba ke merdiman bikero dişmenê yewbînan îqtîdarê xo nano ro.

Qet yew komelo serdest zî heta nika wina tahrîbkar nêbibi

Ganî terîmê kapîtalîzmî yê sey kede, kar, vaye, parekerdiş, emperyalîzm, şerî na çarçewe de bêrê famkerdene. Kitabanê dînîyan de yeno vatene ke 'Deccal do bêro' ke no îfade seba raştîya na sinife (burjuvazî) eşkeno bêro xebitnayene. Komelêko serdest zî heta nika vera xozayî û bingeyanê komelî wina tehrîbkar nêbibi. Raştîya sinifa burjuva ke neteperwerîye ra nîjadperestîye, raştîya karî ra bêkarîya vetî meydan kena ke hînî xo îmha bikera. Şorişê vera xo a bi xo kena. Wexto komelkî yo newe têna bi vergirewtişê rastîya na sinife eşkeno xo awan bikero.

Komel pê hesîya ke tarîxê xo de reya verêne kewt mîyanê kaosî

Kapîtalîzm keno ke merdimî dişmenê yewbînan bibo ke na rewşe bena semedê asayîşê komelkî. Hînî asayîşo komelkî têna pê eşqîyayan yan zî pê sûcan nêno xirabkerdene; sere de bêkarîye û vêşanîye benê semedê na rewşe. Sere de AIDS, kanser nêweşîyê kaoswarîyî  vejîyenê meydan. Komelo ke nêwazeno îmkananê cuye ra cîya bibo, reya verêne pê hesîya ke nêeşkeno çareserîya mende bivîno yanî kewt mîyanê kaosî.

Zanisto ke binê fermanê îqtîdarî de yo rolê xo nêano ca

Huner, zanist-teknîk ê ke ganî nê prosesî de bikewê dewre rîyê destsernayîşê îqtîdarî ra nêeşkenê rolê xo bîyarê ca. Her ke paştdayîşo komunel qels beno pawitişo tradîsyonel zî qels beno û herinda xo verdeno şîdetê şexsî û şîdetê cergan. Vera terorê îqtîdarî terorê êşirî û qabîleyî ganî benê. Semedo ke qaîdeyê têdûştîye yê bingeyî yê dewleta huqûqî nênê caardene hêzê pawitişê heqan virazîyenê û no zî rewşa pawitişê meşrûyê şarî rê rayîrêk keno a. Wexto ke dewlete neteperwerîye zaf vejene meydan neteperwerîya etnîke zî bihêz bena. Na zî bena semedêkê şîdetî.

Spor û huner ameyî vurnayene hacetê kundoxî

Aktîvîte û dezgehê sey aspo û hunerî herinda ke têkilîya komelan şenik bikerê û hetkarîya çareserîya bikerê yenê vurnayene hacetê kundoxî ke no zî beno semed ke rewşêka sextekêne bivejîya werte. Dîn, mezheb û tarîkatan rê heman mesuldarîye yena dayene, yeno astengkerdene ke komel rastîye bivîno û bi awankerdişê 'dinyaya wetêre' cematê domînantî sey astengê çareserîye yenê wezîfedarkerdene.

Zanist û teknîk ê ke destê îqtîdarî de yê

Tewr zaf nê wextan de zanist û teknîk ê ke seba newe ra awankerdişî rayîran mojnenê, roşnî danê seba ke binê destê îqtîdarî de yê nêeşkenê çareserîya komelkîye de rol bigêrê xo ser. Çareserîyê bêhempayî seba ke hacetê têna bi armancê karî û şerî bêrê peydakerdene yenê xebitnayene. Bi nê hawayî zî seba averşîyayîşê kaosî zî yenê xebitnayene.

Mumkîn o ka ma pênasê kaoso ke sîstemî bi tewrkerdişê pêro komelî ard meydan, hîra bikerê. La no pênas bi xo zî bes o. Eke ma verî ke rewşa kaosî fam nêkerê û seke ma nîzamê normalî de ciwîyenê têbigêrê ma herinda çareserîye de bêçareserîye ganî kenê. Ma her wextî ra zêdêr hewcedarê xîretê entelektuelî yê. Çîyê ke qewimîyenê bi awanîyanê zanistan ê kahanan (zanîngeh, dîn) rast nênê famkerdene. Ganî ma nê wextan de rolê şorişê duştî yê sporî, dînî, zanistî û hunerî başêr bivînê. Hewcedarîya pê awanîyanê zanistî yê sey dibistanan û akademîyan vera zêdîyena.

Hanî şerê hîşmendîye erjanê moralî reyde pîya bibê. Heta ke moral û exlaq pê hîşmendîye nêrê peydakerdene, netîcegirewtiş şikdar û demkî beno. Ganî rastîya bêexlaqkerdişê sîstemî ser o bêro vindertene û têgêrayîşê biexlaqî û etîkî dezgehan, şexsan de bêrê temsîlkerdene. Eke etîkî û exlaqî ra azade kaosî reyde bêro rastameyene, no beno ke bi xeniqîyayîşê komelî û  şexsî bi netîce bibo.Exlaq ganî tradîsyonê komelkîyî pey goş nêkero û etîkê komelî îlaweyê ey bikero. Seba ke komel vera dezgeh û hacetanê sîyasetî newe ra awan bibo ganî bi hawayêkê taybetî giranîye bêra dayene polîtîkayanê ganîyîyan û hacetanê polîtîka. Ganî partîyî, weçînayîşî, meclîsî û îdareyê herêmîyî yê ke do caardişê komelê demokratîkî û ekolojîkî de ca bigêrê na mesele hetê tewirî û tedeyî ra çareserîyêke bivînê.

No nuşte kitabê Rayberê Şarê Kurdî Abdullah Ocalanî yê ''Pawitişê Şarêkî''ra ame girewtene.