Parlamenterê Partîya Demokratîke ya Şaran (HDP) yê Amedî Hîşyar Ozsoyî derheqê zemê qeyûmê Amedî yê mabênê se ra 35 û 330î de vernîyazêkê persî da Serekîya Meclîsî û sebebê nê zemî  Hetkarê Serekkomarî Fuat Oktayî ra persa.

Ozsoyî vist vîrî ke gama ke 31ê adara 2019î de Şaredarîya Bajarê Pîlî yê Amedî qeyûmî ra ameye girewtene Karê Awe û Kanalîzasyonî yê Amedî (DÎSKÎ) 611.095.892,90 TL amebi  deyndarnkerdene û vat heta ke şaredarîye de 19ê tebaxa 2019î de reyna qeyûm ame cakerdene nê deynî ra 30.240.975,53 TL ame  dayene û  la seke şaredarîye hetê qeyûmî ra yena rayraberdene derheqê DÎSKÎ de zanayîşê zelalî nînê girewtene. Ozsoyî vat 22ê kanûna 2019î  de awe rê zemo zaf gird ame kerdene ke nê problemî çareser bikerê. Awe rê se ra 35 û 330î zem kerd ke cebê şarî pere bigerê pê naye akerdeyanê xo biqefilnê.

Ozsoy  seba ke Hetkarê Serekkomarî Fuat Oktayî cewab bikero wina persa:

-Qey zemê ke wextê HDPyî de nêbîyê, wextê qeyûmî de benê?

-Qey wina zemêko gird ame kerdene?

-Qey wextê qeyûmê verênî de DÎSKÎ wina bi deyndar?

-Seba ke nê deynî bêrê dayenê  no zem bîyo?

-Derheqê deynanê wextê qeyûmî verênî de cipersayîşêk ame kerdene?

-Eke cipersayîş ame akerdene nika kam merhale de yo?

-Yeno zanayene ke awa şimitîşî heqo unîversal o, no zem heqê merdimîye rê hêriş nîyo?