Wekîlê HDPyî Hişyar Ozsoyî meclîs de vera sereştişê keyeyê Fîlîze Buluttekîn nêrazîbîyayîşê xo mojna û vat Mudirê TEMî yê Amedî yo ke fermanê destbendkerdişê Buluttekîne dayo çarçewa 'Cematê Gulenî' de ''endamîya rêxistina terorî'' ra yeno hukmkerdene.
Wekîlê HDPyî yê Amedî Hişyar Ozsoyî meclîs de derheqê destbendkerdişê Hemşaredaranê Sûrî Fîlîz Buluttekîn û Cemal Ozdemîrî û herinda înan de tayînkerdişê qeyûmî de qisey kerd û vera sereştişê keyeyê Hemşaredara Sûrî Fîlîze Buluttekîn û çekeantişê sereyê aye bi hawayêkê xurtî nêrazîbîyayîşê xo mojna.
Ozsoyî vat: "Hemşaredara ma pîya bi mêrde û domanê ci yo 10 serre erd ro ameyî raqeldayene û sereyê înan rê çeke ameye antene. Ez têna wazena ke bala şima bianca na mesele ser. Hînî sînorêkê na xirabîye nêmend."
Ozsoyî da zanayene ke Mudirê TEMî yê Amedî yo ke fermanê destbendkerdişê Buluıttekîne dayo çarçewa ''Cematê Gulenî'' de ''endamîya rêxistina terorî'' ra yeno hukmkerdene û dewaya ci hema nêameye safîkerdene. Ozsoyî vat: "Wezîr Suleyman Soyluyî her tim seba hemşaredaranê tepişteyan vano 'Derheqê înan de tehqîqatê rêxistina terorî esto.' La merdimo ke derheqê ci de tehqîqat ney dewaya rêxistina terorî esto hema zî Mudirê TEMî wezîfeyê xo dewam keno. Eke na babete ser o xeletîya ma esta ganî Suleyman Soylu yan zî Wezîrê Edaletî Abdulhamît rê bipersê. "
"Şima senî eşkenê çeke biancê sereyê domanê 10 serreyî ? Eke no serebût Fîlîstîn de bibîyêne şima kerdêne rojdemê xo. Sûr de 5 serran ra nata zulm esto, raşanayîş esto. 5 serran ra nata qedexeyê vejîyayîşê teberî esto. Hemşaredaranê Sûrî se ra 65 rayî girewtî. Şima nêeşkenê înan bi nê hawayî ci rê zulm bikê."
