Derheqê babeta Kirimî de Tirkîya û Rûsya reyna pêkewtî. Verî Vervatoxa Karanê Teberî ya Rûsya Mariya Zakharova dima zî Wezîrê Karanê Teberî yê Rûsya Sergey Lavrovî Kirimî ser o Tirkîya kerde hedef û şîyar kerd ke wa Tirkîya nêkewan yewparetîya erdê Rûsya.

Vervatoxê Karanê Teberî yê HDPyî Hîşyar Ozsoyî derheqê mesele de qisey kerd.

Ozsoyî ard ziwan ke Zakharova bi taybetî şîyar kerd ke eke Tirkîya tewra meseleya etnîke ya Rûsya biba Rûsya zî do mudaxeleyê meseleya etnîke ya Tirkîya bikera. Ozsoyî vat: ''Tirkîya wexto ke Sûrîye de nêeşkaye Amerîka bigêra xo het nêzdîyê Rûsya bîye û Astana de kurdî bloke kerdî. La Dengizê Sipî û Ewropaya Rojhelate de nêzdîbîyayîşêko winasên çin o. Uca de bi taybetî Kirim girîng o. Her çiqas Tirkîya NATOyî rê meseleyan virazena zî Dengizê Sipî de pîya têgêrenê. Tirkîya tîya de wayîra pozîsyonêkê xurtî ya. Tirkîya Dengizê Sipî de leşkera NATOyî ya. Amerîka û Îngilîstan Tirkîya teşwîq kenê ke Dengizê Sipî de biba wayîra tewirêkî.''

Ozsoyî eşkera kerd ke Rûsya Dengizê Sipî, Lîbya û Sûrîye de vera Tirkîya wayîra xeylêk kartan a. Rûsya do bikera ke Erdogan bedelê ney bido. Tirkîya hema zî wazena alozîya mabênê NATO û Rûsya ra îstîfade bikera û heta astêke heta wextê Bidenî wina kerd. Çunke Bidenî vatbi ke ê do Ewropa û NATOyî reyde nêzdî ra bixebitê. Zanîyeno ke Trump vera NATOyî bi. Nika mabênê NATO, Ewropa û amerîka de nakokîyî zaf kêm ê. No do têkilîyanê Rojawan (Ewropa) û Tirkîya zî zelal bikero. Coka manewrayê Tirkîya do bikêmîyê.''