Almanya perey meymandarîya kombîyayêkê mîyanneteweyî kerdbi. Konferans de ke seba qedînayîşê şerê zereyî yê Lîbya rayberîya Almanya de ame kerdene sere de lîderê DYA, Çîn, Tirkîya, Îngilîstan, Fransa û Misir lîderê zaf welatan amade bîyî.

Serekkomarê Tirkîya Recep Tayyîp Erdogan zî bi dawetê Angela Merkel tewrê konferans bi. Wexto ke Erdogan ame Berlin nawnayîşêko girseyî yê şermezarkerdişî ame kerdene. Wexto ke konvoyê Erdoganî nêzdîyê bînaya serekwezîrîye ra derbaz bîyêne cinîyêke çalakîya bêîtaatîya sivîle kerde.

Dîmenan de ke hetê muxabîrê ZDFyî Andreas Kynastî ra ameyî girewtene yeno dîyene ke pawitoxê Erdoganî hêrişê nawnayîşkerêke kenê. Cinîya ke bîye hedefê hêrişê pawitoxanê Erdoganî û nameyê ci nêame eşkerakerdene wextêk hetê polîsanê almanan ra ameye destbendkerdene.

Yewînanê asayîşî yê Almanya da zanayene ke seba ke ê cinîye pawitoxanê Erdoganî ra bipawê ameyî cayê serebûtî. Tay terefgîranê rejîmê Erdoganî yê Almanya zî bi îdîaya ''Serekkomarê ma rê heqaret kerd'' gerreyê aktîvîste kerd.