Parlamenterê HDP’yî yê Amedî Garo Paylanî vat eke semedê wayîrvejîyayîşê şaredarîyanê HDP’yî cesaret bêro ramojnayene, Enqere û Stenbol vînî nêkenê. Ewro xelisnayişê Amed, Wan û Mêrdînî do îklîmê tersî zî vila bikero.

Kampanyaya AKP'yî Nêtepişena

Parlamenterê HDP’yî yê Amedî Garo Paylano ke derheqê qeyûmanê vera şaredarîyanê hîrê bajaranê pîlan ê HDP’yî û vera naye xoverdayîşo ke yeno dayene de qisey kerd ard ziwan ke Tirkîya neheqîya girde vînane la rixmê naye reaksîyono ke dana kêm o. Paylanî bale ante hêrişê hukmatî yê vera HDP’yî ser û va:‘‘Kampanyaya ke AKP vera hemşaredaranê HDP’yî rayra bena, nêtepişena. Zurê koyî rê pere şawenê û îftîrayê înan ê bînî zî nêtepişenê. Şarê Tirkîya eşkera vîneno ke neheqîya girde bena la vera naye reaksîyon ke hewce keno nêno dayene.‘‘

Eke Ma Amedî Bixelisnê, Ma Stenbolî Vînî Nêkenê

Paylanî weçînitişo peyên zî vist vîrî û va: ‘‘ Weçînitoxî Enqere, Stenbol, Edene, Mersîn û Îzmîr de rixmê heme polîtîkaya dişmenîye ya Erdoganî bîyî yew û kewtî ser. Eke ma nika zî vera Erdoganî yew bi ma ey rê danê vînîkerdene. Erdogan nika hêrişê Amed, Wan û Mêrdînî kerd. Ganî şarê Tirkîya hîna zaf kişta nê hîrê bajaranê ma de vindero.Tayî embazê ma yê CHP’yijî tewirê xo ramojnenê. No tewirêko erjaye yo.CHP ganî sey dezgehkî zî nê tewirî ramojno. Eke ma nê cesaretî nika ramojnê, ma Stenbol û Enqere vînî nêkenê. Ewro xelisnayişê Amed, Wan û Mêrdînî do îklîmê tersî zî vila bikero. Ganî ma pêro pîya vera na neheqîye bivejîyê. Ganî her kes berpisîyarîya xo bica bîyaro.‘‘