Amed de serkêşîya dezgehanê demokratîkan de Şîyar Be! Platformê Têkoşînê Vera Madayê Kungkerdişî ame ronayene. Verê ronayîşê platformî Parka Sûmerî ra heta Burcê Yedî Kardeşler bi tewrbîyayîşê Hemsereka Pêroyî ya Partîya Herêmanê Demokratîkan (DBP) Çîgdeme Kiliçgun Uçar, wekîl, hemşaredar, temsîlkaranê partîyanê sîyasîyan û dezgehanê demokratîkan rayraşîyayîşêk ame kerdene.

Badê rayraşîyayîşî Şerefxan Aydinî ke bi nameyê platformî qisey kerd, nê vatî: ''Her kuçe de, bajar de tesîrê madeyê Kungkerdişî girdêr beno. Madeyê kungkerdişî  şerêkê leyminî ra yew o. Vera nê gerek ma têkoşînê xurtî rayra berê.''

Metnê deklerasyonê platformî kurdkî û tirkî hetê Hemserekan Gulşene Demir û Murat Kanî ra ame wendene.

Deklerasyano de wina ame vatene: ''Estbîyayîş, ganîbîyayîş û merdimbîyayîş û nasnameyê ma erjê ma yê kulturkî û ehleqî bewlî kenê. Komelo ke nê erjanê xo ra biqerfîyo, xo rê beno xerîb û nasnameyê kewnî têmîyan. Halê xobîyayîşî bena zehmet. Tarîx ramojneno ke şarê ke erjanê komelbîyayîşê xo nêpawenê ya asîmîle bîyî ya zî çîn bîyî.

Madeyê kungkerdişî û fûhûş vera anorê merdim û komelî sûcanê tewr girdan ra yê. Têkoşînê vera nê têna meseleya şexsî nîya meseleya wîjdanî  û ameyoxî ya komelî ya. Komelê ke nînê têhet, tim raştê polîtîkayanê leyminan ê serdestan. Azadîye bi wayîrvejîyayîşê erjanê komelî bena. Komel têna bi wayîrvejîyayîşê erjanê xo eşkeno bibo komel.

Problemê sey madeyê kungkerdişî , fûhûşî problemê ferdî nîyê, problemê komelkî yê. Ma vera madeyê kungkerdişî vengê xo berz bikerê.  Ma pêro berpisîyarê ke nê probelmî çareser bikerê. Komel bi bêvengîye erjanê xo vînî keno. Ma na bêvengîya pêro pîya bixeripnê û ameyoxê azadî înşa bikerê.''