Polîsan eşt keyeyê hemserekê verênî yê HDPyî yê qezaya Esenyurtî yê Îstanbulî Edîp Karçîk ser. Polîsan awil birazîyê Karçikî û kekê ci yê bikanserî derb kerdî û dima zî vat: ''Adres şaş bi'' û cayê serebûtî ra şîyî.

Karçîko ke derbî ra dest, ling û rîyê ci birîndar bîyî ame berdene bi Nêweşxaneyê Dewlete yê Esenyurtî. Biraze û kekê ey zî ameyî berdene bi Nêweşxaneyê Dewlete yê Kanûnî Sultan Suleymanî.

Karçîkî ANF reyde qisey kerd û vat ke polîsan bi zanayîşî eşt keyeyê ci ser û vat: ''Ma do na babete teqîb bikerê û gerreyê polîsan bikerê. Îxbarêko şaş çinbi, bi zanayîşî ameyî û ma derb kerdî. Polîîkaya teda  ya. Netîceya nê îqtîdarî û zîhnîyetê ci ya.''

Karçîkî derheqê serebûtî de vat: ''Saete dormeyê 22:00-23:00 bîye, kekê mi kanserî ra tedawî beno , amelîyat zî bibi. Nişka ra polîsan eşt keyeyê ma ser. Wexto ke mi inan rê vat 'Kekê mi nêweş o, şima çira danê birazîyê min ro?' ez kaş kerda û eşt war. Rîyê mi û lingê mi derb kerdî. Nasnameyê mi berd. Dima zî vat 'Îxabarêko şaş o' û şîyî.''

Komîsyona Çapemenîye ya Îstanbulî ya HDPyî hêrişê polîsan bi hawayêkê zorî şermezar kerd.

Eşkerayîye de ame vatene ke na teda û zorbazîye do nêeşkê têkoşînê înan biqednê.

HDP do derheqê babete de 16ê sibate de saete 16:00 de bînaya xo ya qezaya Esenyurtî de kombîyayîşêkê çapemenîye serûber bikerê.