Hemserekê Pêroyî yê HDPyî Sancar û wekîlan Dêrsim de 19.38 de qurbanê Terteleyê Dêrsimî yad kerdî. Dezgehanê elewîyan ê Îstanbul û Îzmîrî de hişmendîya qirkerdişî şermezar kerde.

Dêrsim de bi beşdarîya Hemserekê HDPyî Mîthat Sancar, Rêxistina HDPyî ya Dêrsimî, Wekîlan Tulaye Hatîmogullari, Alîcan Onlu, Zeynel Ozen, Kemal Bulbul û Alî Kenanogluyî saete 19.38 de Meydanê Seyîd Rizayî findî vistî ta û qurbanê Terteleyê Dêrsimî yad kerdî.

Tîya de Wekîla HDPyî Tulaye Hatîmogullari qiseykerdişêk kerd û ard ziwan ke cinîyan wextê terteleyî de seba ke maruzê tecawuzî mebê xo kendalan ra eştêne war. Tulaye Hatîmogullari vat: ''Awa Munzurî sey gonî herikîyaye, ganî hînî na cografya de haştîye biba.''

Yadkerdiş bi şiwaranê hunermendan qedîya.

Qezaya Kadikoyî ya Îstanbulî de serkêşîya rêxistinanê elewîyan de qurbanê Terteleyê Dêrsimî ameyî yadkerdene. Wekîla HDPyî Zuleyha Gulum û Hemserekê HDPyî yê Îstanbulî û xeylêk temsîlkarê partî û dezgehan tewrê yadkerdişî bîyî. Yadkerdiş de bi kirdkî pankarta 'Ma çîyêk xo vîr a nêkerdo, çîyêk efû nêkerdo' ameye akerdene. Yadkerdiş de findî ameyî tavistene. 

Yadkerdiş de Sekreterê Pêroyî yê Federasyonê Komeleyanê Dêrsimî (DEDEF) Hasan Şenî eşkerayîye wende. Eşkerayîye de ame vatene ke îqtîdarê AKP-MHPyî wayîrê mîrasê hişmendîya qirkerdişî vejîyeno. Şenî ard ziwan ke ê wazenê cayê goranê Seyîd Riza û embazanê ci bêro eşkerakerdene, arşîvê serê Terteleyê Dêrsimî bêro akerdene, nameyê Dêrsimî apey bêro dayene, lîsteya surgunan û vînîbîyayeyan wa bêra eşkerakerdene, efû bêro waştene û projeyê texrîbatî yê vera ekolojîya Dêrsimî wa cade bêrê betalkerdene.

Zuleyha Gulum û Hemserekê HDPyî yê Îstanbulî Ferhat Encuyî  eşkerayîya ra dima pare kerd ke ê do hesabê Terteleyê Dêrsimî pers bikerê. 

Îzmîr de Federasyonê Komeleyanê Dêrsimî, Komeleyanê Dêrsimî yê Îzmîrî û Şubeyê Îzmîrî yê Komeleya Demokratîke ya Elewîyan (DAD) qurbanê terteleyî yad kerdî, eşkerayîyêke wende. Wekîlê HDPyî Musa Pîrogluyî temsîlkarê partî û dezgehan zî tewrê yadkerdişî bîyî.