Rayraşîyayîşê 25 rojan o ke bi wesîleya serrgêra Komployê 15ê Sibate yê vera Rayberê Şarê Kurdî Abdullah Ocalanî Fransa de ame organîzekerdene bi aktîvîteyanê cîya cîyayan dewam keno.

Rayraşîyayîşo ke Parisî ra ver bi Strasbourgî dîya destpêkerdene roja hewtine de bajarê Rouenî de ame kerdene.

Çalakwanan şar û esnafê derûdorî rê vilawekî vila kerdî. Reyna esnaf û dezgehê fransizan zî ameyî zîyaretkerdene û derheqê rewşa Rayberê Şarê Kurdî Abdullah Ocalanî de dosyayî dîyayî înan. Badê rayraşîyayîşî senî ke bajaranê bînan de zî ame kerdene, kartpostalê ke rayîr de ameyî îmzakerdene Rayberê Şarê Kurdî Abdullah Ocalanî rê ameyî şawitene.

Badê rayraşîyayîşî Komeleya Şarî yê Rouenî de bi tewrbîyayîşê Hemserekê MAF-DADî  Avûkat Mahmut Şakarî kombîyayîşê şarî ame kerdene. Şakarî ard ziwan ke vera tecrîdî çîyo ke destê înan ra yeno kenê û vat na rewşe têna bi têkoşînê huqûqî nîna çareserkerdene.