Bi wesîleya serrgêra Komployê 15ê Sibate yê vera Rayberê Şarê Kurdî Abdullah Ocalanî  Fransa de rayraşîyayîşê 25 rojan ame organîzekerdene. Rayraşîyayîşo  ke Paris de ame destpêkerdene, roja hîreyîne de bajarê Lorientî de dewam keno.

Raywanan verê çalakîye Merkezê Partîya Komîniste yê Lorientî zîyaret kerd û sereke partîye Dr. Boris Campusî reyede ameyî têhet. Caposî paştî daye şarê kurdî û têkoşînê ci yê azadîye. Camposî bale ante tecrîdê serê Rayberê Şarê Kurdî Abdullah Ocalanî ser û ard ziwan ke o sey doktorêk îzolasyonî sey hêrişê girdî hesibneno û vat, ''Eke dewleta tirke raşta haştîye wazena ganî verî keso ke bi desan rey adirbirnayîş îlan kerd, serbest verado.''

Kombîyayîş de veng dîya Komîteya Vergirewtişê Îşkenceyî (CPT) ke wa cade vera tecrîdî têbigêro.

Çalakwan û dostê kurdan ê  ke verê rayraşîyayîşî berê şaredarî de ameyî têhet, eşkerayîyêke daye û waştişê azadîya Abdullah Ocalanî û çarserîya sîyasîye ya meseleya kurdan ard ziwan. Dima ra rayraşîyayîşî bi sloganan dest pêkerd. Rayraşîyayîş siba do bajarê Vannesî yê Fransa de bêro kerdene.