25ê tebaxa 2018î de polîsan hêrişê Mayanê Şemeyî kerdbî û 46 kesî destbend kerdbî. Derheqê 46 kesan de dima dewa amebî akerdene. Roniştişê dewa Mehkemeya Cezaya Aslî ya Îstanbulî de yeno kerdene.

Mayanê Şemeyî roniştişê dewaya vera înan ra verî eşkerayîye daye. Wekîlê HDPyî Musa Pîroglu, Vervatoxê HDKyî Aynure Cengîz û Erkan Tepelî, Hemsereka HDPyî ya Îstanbulî Elîfe Bulut, temsîlkarê baroyanê Amed, Mêrdîn, Bursa, Şirnex, Colemêrg, Anqara, Riha û Îstanbulî û temsîlkarê Weqfa Heqanê Merdiman a Tirkîya (TÎHV) zî tewrê eşkerayîye bîyî.

Temsîlkarê TÎHVî Umît Efeyî pê na dewa merdimîye yena muhakemekerdene û vat: ''Na dewa hetê ma de wayîra qet yew hukmî nîya. Yeno waştene ke aktîvîzmê heqanê merdiman û têkoşînê azadîye bêrê bêvengkerdene.''

Waya Hasan Ocako ke nezaret de dîya vînîkerdene Masîde Ocak zî îfade kerd ke herinda sûcdar û faîlan de mayî yenê muhakemekerdene. Ocake vat: ''Paştgîrê ma, ma yenê muhakemekerdene ke wa merdimê bînî seba heqanê xo û edaletî têkoşîn mekerê. Ma do heta peynî têkoşînê xo rê dewam bikerê. Ma do Meydanê Galatasarayî ra fek vera medê û bêveng nêmanê.''

Eşkerayîye ra dima mayî derbazê salona roniştişî bîyî.