Avûkatanê Buroyê Huquqî yê Asrinî ra Rêzan Saricayi serrgêra Komployê Mîyanneteweyî yê vera Rayberê Şarê Kurdî Abdullah Ocalanî de ANFyî ercnaye.

Saricayî bale ante ser ke bi nê komployî şexsê Ocalanî de sere de şarê kurdî  ameyoxo azad ê şaran hedef ame girewtene û vat: ''La birêz Ocalanî bi fikranê xo perspektîfê neweyî dayî şaranê Rojhelatê Mîyanênî û planê komplokeran pûç vetî. Birêz Ocalanî planê hêzanê hegemonîkan zanayêne coka ey emrê xo da ke wa şarî nînan ferq bikerê û vera înan hîşyar bê û no mîsyonê xo zere de zî dewam kerd. Birêz Ocalan seba ke şarê cîya cîyayî  bi nasname û tarîxê  xo bicuwiyê bi serran têkoşîn kerd û seba kurdan û  şaranê bindestan ê Rojhelatê Mîyanênî perpesktîf û teorîyî vetî werte. Stratejîya bingeyên a perspektîfanê Ocalanî tim haştîye û sîyaseto demokratîk a. Seba ke nê perspektîfî plananê hêzanê hegemonîkan ê ke şerî ra xo weye kenê xeripnenê Komployo Mîyanneteweyî ame kerdene.''

Saricayî ard ziwan ke komployo ke semedê pêkewtişanê dergan ê mabênê kurdan û tirkan ame viraştene ewro bi polîtîkayanê cîyayan yeno domnayene û vat: ''Îqtîdar ewro hetêk ra hêrişê Rojawanî keno hetê bînî ra hêrişê HDP û nasnameyê kurdan keno. Bi hukmo ke pawitişê sîtemî keno wazenê ke tecrîdî bikerê meşrû, Ocalanî têna biverdê û şarî ra raqilnê. Xora yew linga naye zî rojawanê Ewropa yo ke xo sey merkezê demokrasî vîneno o rayra bêno. Tecrîdê Îmraliyî ramojneno ke Tirkîya senî yena îdarekerdene. La ê se kenê wa bikerê komplo nêresayo amancê xo. Ocalanî tecrîdê Îmraliyî ser û bin kerd.''

Saricayî vist vîrî ke badê grevê vêşanîye yo ke rayberîya hemserka KCD û wekîla HDPyî  Leyla Guvene de ame kerdene badê 8 serran înan Ocalan dî û wina qala vînayîşî kerd: ''Ma dî ke tecrîdo ke bi serran o dewam keno birêz Ocalanî ser o tesîr nêkerdo. Fikr, tewir û ûmidê ci senî ke dêsan ra ravertê. Kes nêeşkeno nê şertan de mengêke vinderê la ey fikrê xo hîna aver berdîbî û prosesê polîtîkî rê hakîm bi. Merdim vano qey o teber de yo ma zere de yê. Ey ûmid dayêne ma. Seba şar û sîyasetmedaran vernîyazî dayî. Bitayabetî zî waşt ke şarê kurdî semedê pawitişê kulturê xo wa domananê xo de ziwanê dayîke de qisey bikero. Reyna vat, 'komelo ke tarîxê xo vîr ra bikero nêeşkeno ameyoxê xo bimano û problemanê xo çareser bikero. Komel ganî her kesî ra xoser cuya demokratîke bimano. Sîyaset de zî bi îtîfaqê demokratîkî kes eşkeno aver şiro.' Îmarli de raştîyêka tarîxîye esta. Ewro modernîteyo kapitalîst krîzêko xorî de yo û paradîgmaya Ocalanî nika her wextî ra hîna muhîm a. Ameyoxê şaran destê hêzanê hegemonîkan de nîyo û no girê do mihqeq bêro akerdene.''