Vengdayîşê Kongreya Neteweyî ya Kurdîstanî (KNK) ser o 15ê gulane de pê beşdarîya xeylêk temsîlkaranê partî, rêxistin û dezgehan zoomî ser o komxebatêke ameye kerdene. Komxebate de tewiro neteweyî yê vera hêriş û îşxalê dewleta tirke ame nîqaşkerdene. Hemsereka KNKyî Zeynebe Murad derheqê komxebate de ANFyî rê qisey kerd.

Zeynebe Murad vist vîrî ke hêrişê vera Zap, Metîna û Avaşînî dewam kenê la vera hêrişan bêvengîye esta. Zeynepe vat: ''Seba ke vera hêrişan tewirêko zixm bêro kerdene ma komxebatêka winasêne kerde. Dewleta tirke Başûr de planê îşxalî kena. Gerîlayî vera ney şer kenê. Eke dewleta tirke ser bikewa Başûr bi temamî do îşxal bibo. Pêro beşdaranê komxebate îfade kerd ke eqsê propagandaya dewleta tirke hêrişî vera PKKyî nê vera pêro destkewteyanê kurdan ê.''

Zeynebe Murad eşkera kerd ke komxebate de vera hêrişanê îşxalî seba tewirêkê hemparî, stratejîyêka hempare û têkoşînêkê hemparî îradeyê aferîya labelê tay hêzî beşdarê komxebate nêbîyî. Zeynebe vat: ''Ma wazenê nê kesan reyde têkilîye virazê û înan zî tewrê prosesî bikerê. Ma armanc kenê ke pêro kurdî vera hêrişan wa yewveng bibê.Komxebata ma bi nê armancî gama verêne eşte û naye ra pey zî seba ney xebatanê xo rê dewam bikera.Dewleta tirke mabênê kurdan de nakokîyanê înan sey firsend şuxilnena. Nê nakokîyî benê sebeb ke hêzê mîyanneteweyî û dinya zî vera hêrişan bêveng bimanê.''

Zeynebe Murad bale ante ser ke tewiro neteweyî yê kurdan do tesîrê warê mîyanneteweyî bikero, peynîya bêvengîya bîyaro. Zeynebe vat: ''Ma do dima heyetêk zî awan bikerê ke asta mîyanê kurdan û mîyanneteweyî de pêvînayîşan bikero.''