Kongreya Neteweyî ya Kurdîstanî (KNK) vera hêrişanê îşxalî yê dewleta tirke seba ke 'tewirêko neteweyî' vejîyo werte komxebatêke serûber kerde. Çar leteyanê Kurdîstanî ra sîyasetmedar û roşnvîrî tewrê ci bîyî. Endamê Komîteya Rayberdişî ya PKKyî Murat Karayilanî zî mesajêko bidimen şawit.

Karayilanî derheqê rewşa peyêne ya hêrişê îşxalî yê vera Metîna, Zap û Avaşînî de serê xarîta ra zanayîş da tewrbîyayoxanê kombîyayîşî û qisey kerdişê xo de mesajê muhîmî dayî.

Mesajê Karayîlanî ra qismêk wina yo:

''Embezê ercîyayeyî senî ke yeno zanayene ewro herêma ma Rojheleta Mîyanîne de şer qewimîyeno. No Şerê Dinya yê Hîrênî yo ke pê metodane neweyan yeno rayraberdene. Her kes zano ke badê nê şerî do herême newe ra bêro dîzyankerdene. Dewletanê ke Kurdîstan îşxalker  kerd û kolonyalîstî nêwazenê ke nê dîzaynê neweyî de kurdî ca bigîrê. 2 serrî mendî ke wextê Pêkerdişê Lozanî de bo. Dewleta  tirke ya ke vana Lozan de ci rê neheqîye bîya nika ra hazîrîye kena. Wazena ke Efrînî ra heta Xakurkê herêma taponî rone. Hedefê ci de îşxalê Rojawan û Başûrê Kurdîstanî esto. Vera nê caardişanê dewletanê serdetan ganî ma kurdî pê stratejîya hempare û neteweyîye têbigêrê. Na xebetêka zaf muhîm a. Eke ma pêro pîya sîyasetê neteweyî mevejê vernî û stratejîye raşt mewanê ameyoxê şarê kurdî kewno binê tehlukeyê pîlî. Coka semedê ma no komxebate û cehdkerdişê yewîya neteweyîye zaf muhîm ê.

Ewro hêrişê ke vera herême Behdînan benê bêşik bi destûrê hêzanê mîyanneteweyî yenê kerdene. Ma zanê ke heta ke Amerîka destûr nêdo na herre ser o tîyarayî fir nêdanê. Hukmatê Herêma Kurdîstanî zî bêveng o. Na bêvengîye hêrişê îşxalî yê dewleta tirke kena meşrû. Yanî no paştdayîş o. Çunke dewleta tirke tecawuzê herra Kurdîstanî kena.  Pê topan û tankanê xo her cayo ke şina wazena tede xo ca bikero mende bo. Dewleta tirke vanê 'ma semedê kurdan nê semedê PKKyî yenê' û hukmatê herême zî nayî ra bawer keno. Biewnê; tirkî 950 serrî yo tîya de yê, Anatolyaya de yê. A roje heta nika dewleta tirke sozê ke dayî şarê kurdî û mîranê ci qet yew nêerdo ca. No tim wina yo. Gama ke serhildanê kurdan dest pêkenê tay kurdan genê cayê xo, kenê hempar û pîya bi înan şinê serhildanan ser. Bado ke serhildanan tesfîye kenê hemkaranê xo zî tesfîye kenê. Vatişê 'Osmanîyan de kayî zaf ê' esto. Xora tarîxê Tirkîya de zî eşkera eseno ke senî îşxalker ê, cayê ke kewtî de hinî tira nêvejîyenê. Nînan  ra bawerkerdiş xeletîya pîl a.

Hela ke ma raştîyan anê ziwan waybirayê ma vanê 'PKK vera Tirkîya şer keno û wazeno ke ma pêro tewrê nê şerî bibê'. Êyê ke wina fikiryenê vatişanê ma  ser o hende nêvendenî, goştarîya ma nêkenê. Goşdarîya dewleta tirke kenê. Dewleta tirke bi desan reyî kurdî xapînayî. Ganî kurdî paştê xo înan rê girê medê. Tay raştîyeyî estê ke ganî bêrê naskerdene.Tirkîya têna çarçeweya sîyasîyî de naskerdişê nêvejeno. Ganî xeta îdeolojîke, stratejîya ci û çi fikiryena bêro zanayene. Coka na xebate zaf muhîm a. Xebata yewîya neteweyîye xebatêka bimbarek a. Ez pê bawer a ke birêz Kek Mesûd na rewşe bivîno. Reyna Hemserekîya YNKyî û îdareyê ci yo sîyasî, îdareyê Têgêrayîşê Goranî zî do raştîye bivînê û vera ci tewir bigîrê. Xora Partîya Komînîste û Partîya Bindestan tewirê xo ramojnabi. Têna Başûr nê ganî çar leteyanê Kurdîstanî de semedê yewîya neteweyîye xebatî bêrê pîlkerdene.

Embazê ercîyayeyî şima waşt ke ez behsa rewşa peyêne şerî bikerî. No operayonêko normal nîyo. Leşkeran a pîya çeteyê surîyeyîjî operasyon de ca genê. Senî ke hêrişê dewletêke bikerê wina hêriş kenê. Hêrişê raştê roja Qirkerdişê Armanîyan ard ke mesaj bidê ma. Seba ke şima rind fehm bikerî ez serê xerîta ra îzah bikerî:  Nika Metîna, Zap û Avaşîn de şer esto. Cayanê sûran de dewleta tirke esta û cayanê çeqeran de zî gerîlayî estê. Metîna de dişmen resayo Qilê Zendûra û tîya tay cayî tepiştî. Na herême de şer qewimîyeno. Embazê ma hema Qilê Zendûra de yê. 20 rojî yo ke dişmen nêeşkeno înan uca ra vejo.  Zap de dişmen di qolan ra wazeno aver şiro. Nînan ra yew warê Ciloyê Qicî yo, a bîne zî xeta Qela Bêdewê ya. La xoverdayîşê ra nêeşkenê aver şirê.

Şero tewr pîl Avaşîn de yeno qewimîyayene. Dişmen tîya Şemzînanî ra kewt warê Mamreşoyî. Hetê bînî ra zî Geverî ra kewt warê Mervanusî. Awa Avaşînî mabên de ya. Nika dişmen wazeno hîrgoşê Avaşîn û Basya de emazanê ma bigerê binê ablûqa. Semedê nayî Mareşoyî de şero giran qewimîya. Dewleta tirke tîya çeka kîmyewîye şuxulnaye. Serkeşîya fermandar Serhat Giravî de xoverdayîşo destankî ame dayene. Nika dişmenî Şikeftê Mamreşoyî girewt la şer dewam keno. Tîya şer herêma Aris-Farisî de giran o.Reyna warê Mervanusî de şer esto. Bi vatişê kilmî nika seranserê cepheyî de şer esto. Ma pê xo bawer ê la eke paştî bidîyo xoverdayîşê gerîlayan, gerîlayî tîya eşkenê kolonyalîzmê tirke bişiknê.Eke ma sey kurdan wazenê bibê wayîrê statuyî ganî ma vera kolonyalîzmê tirkî îradeyê xo ramojnê. Na meseleya estbîyayîş û çînbîyayîşî ya kurdan a. Coka stretejîya hempare zaf muhîm a.''