Hemşaredarê Bajarê Pîlî yê Amedî Adnan Selçûk Mizrakli, hemşaredarê Bajarê Pîlî yê Mêrdînî Ahmet Turk û hemşaredara Bajarê Pîlî yê Wanî Bedîa Ozgokçe Ertane yê ke raştê derbeya qeyûmî ameyî şaredaranê Ewropa rê mektube şawite.

‘No Qerar Derbeyêka Hukmatî ya‘

Mektuba ke sere de Barcelona, Parîs, Londra, Stockholm, Oslo, Roma, Mîlano, Venedîk  şaredaranê Ewropa rê ame şawitene de bale ame antene muhîmîya şaredarîyanê Amed, Wan û Mêrdînî ser û ame vatene ke nê bajarê ke 3,8 mîlyon kesî dete ciwîyenê qelayê HDP’yî yê.

Mektube ra tayî cayî wina yê: ‘‘Weçînitişê 31’ê Adar a 2019’î de  ma bi rayana zêdan na serekîya nê şaredarîyan girewte la rixmê naye 19’ê Tebaxe de qeyûm herinda ma de ame cakerdene û ma wezîfeyê xo ra ameyî dûrfînayene. Meclîsê şaredarîyanê  ma bi qerarê keyfî ameyî vilakerdene. Ma nê qerarî sey derbeya hukmatî vînenê. No nimûneyo peyên ê hêrişê rejîmê Erdoganî yê vera Kurdan o.

'Qeyûma Şaredarîyê Ma Talan Kerdî'

Hewldayîşê derbeya 15’ê Temmuz a 2016’î ra dima hemserekê ma yê pêroyî yê o wextî Selahattîn Demîrtaş û Fîgen Yuksekdage, parlamenter û  hemşaredarê ma bîlaheq, bêhuqûqî ameyî tepiştene.102 şaredarîyanê ma ra 95’ine rê reyna qeyûm amebi tayînkerdene. Mabênê 2016-2018 de qeyûman şaredarîya ma kerdî deyndar, talan kerdî.

'Mucadeleyê Ma yê Haştîye do Ser Bikewo'

Hukmat sebebê qeyûmî sey terorî ramojneno la xora heme dinya zana ke goreyê Erdoganî kam ke kişta ey de nêyo o terorîst o. Reyna şaro ke wayîr îredayê xo vejîyeno raştê hêrişê polîsan yeno. Ma tîya pîya bi şarê xo rixmê heme hêrişan xover danê. Eke şima paştî bidê ma, ma naye ra hêz gênê. Ma paştdayîşê şima ra keyfweş benê. Welatê ma de şertî senî çetin benê wa bibê ma do mucadeleyê haştîye û edaletî de ser bikewê.‘‘