Qezaya Sultanbeylî ya Îstanbulî de tay kesan hêrişê Cemxaneyê Komeleya Kulturî ya Pîr Sultan Abdalî kerd. Nê kesan berî şikitî û dekewtî cemxane û erdê cemxaneyî ser o   ''nêqedîya'' û ''bimire'' nuşt. Pencerayî û berê cemxaneyî ameyî şiknayene û cemxane ame serûbinkerdene. Kesanê ke pê zorî dekewtî cemxane, pereyî zî diznayî.

 Serekê cemxaneyî Erdal Aksoyî derheqê babete de PÎRHA reyde qisey kerd û vera serebûtî nêrazîbîyayîşê xo mojna. Aksoyî vat: "Ma serê sibayî wexto ke ameyî ma pê serebûtî hesîyayî. Ma derheqê serebûtî de cigêrayîşê xo dewam kenê.''

Aksoyî îfade kerd ke notanê ke hetê nê kesan ra ameyî nuştene ra yeno famkerdene ke no hêriş do dewam  bikero. Aksoyî ard ziwan ke ganî elewîyî vera nê hêrişî pîya têbigêrê. Aksoyî bale ante ke muneqeşayê ke derheqê elewîyan de medyaya komelkî de yenê kerdene elewîyan bêîtîbar kenê. Aksoyî venga elewîyan da ke bibê yew.