Buroyê Huqûqî yê Asrinî vera tecrîdkerdişê muwekîlê xo Ocalanî nêrazîbîyayîş ramot û vat: "Şert û mercê zîndanê girave yê ke weşîya muwekîlê ma ser o tesîrêkê xirabî kenê bi birnayîşê têkilîya teberî tecrîdêko mutlaq muwekîlê ma keno''
Avûkatanê Rayberê Şarê Kurdî Abdulah Ocalanî derheqê tecrîdê 21 serran ê Ocalanî de ANF reyde qisey kerd. Avûkatan astengkerdişê pêvînayîşanê Ocalanî pênas kerd.
Avûkatan vat: "Îmrali de qet huqûq nêno xebitnayene. Her tim nêzdîbîyayîşêko taybet ê rejîmêkî vera şexsêkî yeno mojnayene. Qedexeyê Îmraliyî bi hawayêkê sîyasî yenê kerdene. Eke merdim çarçewa dwleta huqûqî de biewno ganî seba her muracatêkê ma cewbaêk bêro dayene û pêvînayîş bêro kerdene. Rejîmêkê winasênîn de bi şert û mercanê zîndanê girave yê ke bi hawayêkê giranî tesîrê weşîye kenê bi cezaya hucreyî, kerdişanê xiraban, tewr peynî de zî bi birnayîşê têkilîya teberî tecrîdêko mutlaq yeno kerdene. No tecrîd seba çinkerdişê îradeyê azadî, têdûştîye, demokrasîyê şaran yeno kerdene.
Ocalan şexsê xo de bi modernîteya demokratîke û wezîfeyê awankerdişê aye hetê teorîkî ra nê rejîm çin kerd. Çinkerdişê rejîmê tecrîdî bi hawayêkê pratîkî zî bi serkewtişê wezîfeyanê awankerdişê sîstemê demokratîkî yê herêmî û mîyanneteweyî beno. Bi serkewtişê Blokê Îtîfaqê Demokratîkî û Îtîfaqê Demokratîkî yê Tirkîya beno. Tecrîd têna nê bingeyî ser o bi rêxistinîye, têkoşînî û îtîfaqê hêzanê komelî yê demokratîkî eşkeno bêro şiknayene. Bi pîlkerdişê bingeyê komelî yê nê îtîfaqî û raydayîşê meclîsî no zîhnîyeto tekperest do bêro çinkerdene.
Sîstemê tecrîdê Îmraliyî sîstemêk o ke hîrê lîngê ci estê. Lingê ci yo yewîn DYA, ê dîyîn Yewîya Ewropa û ê hîrêyîn zî Tirkîya yo. Rolê Tirkîya têna gardîyanî yo. Hêzo esas o ke polîtîkaya ci weçîneno DYA yo. Rolê Yewîya Ewropa zî yew nîyo. Ocalan vera polîtîkayanê înan ê nêçareserîyan polîtîkayan nîşanê şarî keno; Tirkîyaya demokartîke, Îrano demokratîk, Iraqo demokratîk, Sûrîyeya demokratîke...Coka tecrîd yeno manaya bêçareserkerdiş. No tecrîdê yewîya demokratîke, Tirkîyaya demokratîke û Rojhelatê demokaratîkî yo. No tecrîdkerdişê haştîye û demokrasî yo. Bi vatişê muwekîlê ma Ocalanî demokrasî çarserîya demokratîke û haştîye şaran ra eşkenê bêrê awankerdene. Tecrîd bi serkewtişê îtîfaqê qanûnê bingeyî yê demokratîkî û îtîfaqê demokratîkî yê şaran eşkeno bêro çinkerdene."
