Konferanso Pîl ê 3. ê HDPyî bi şîara ''HDPyo hîna bihêz, têkoşîno hîna bihêz'' Anqara de yeno kerdene.  600 delegeyî beşdarê konferansî bîyî. HDP netîceyanê konferansî 23ê sibate de kongreya xo ya 4. de do eşkera bikero.

Konferans bi qiseykerdişê Temellîyî dewam keno.

Qiseykerdişê Temellîyî ra tay beşî wina yê:

"Sîstemo newe yê dinya ho vurîyeno. Dinya nika gêrena sîstemêkê neweyî. AKP zerrîwazê nê sîstemê neweyî yo. AKP çinkerdişî ra ber çîyêk nîyo ke ma ewro rî bi rî yê. AKP xo pê bêçareserîye û mesela kurdan weye keno.

Senî ke dinya gêrena sîstemê neweyî AKP zî wazeno ke sîstemê îtîhatî newe ra awan bikero ke sey serranê 1920an ewro zî bi polîtîkayanê neo-osmanijan şer û çinkeriş dewam bikero. Polîtîkaya AKPyî têna çinkerdiş o.

îqtîdarê AKPyî îqtîdarê bêhuqûqî û zorbaz o. Semedê rijîyayîşê sîstemê edaletî tecrîd o. Tecrîd têna Îmrali de ney pêro Tirkîya de esto. No tecrîd verê çareserîye gêno. 

Zîndanan de no sîstemo zorbaz esto. Ewro zîndanan de îşkence esto, binpaykerdişê heqan esto.

Mesela zîndanan fotografê Tirkîya baş mojnena ra.
Ganî ma reyna fikranê Lenînî biercnê, ganî ma warê rêxistinbîyayîşê komelkî de reyna Ocalan biwanê fikranê ci fam bikerê. 

Ganî ma taxan de meclîsanê xo awan bikerê, firsend bidê ke hem ma  hem zî komel xo rêxistin bikerê. HDK û DTK reyde ganî ma rêxistinbîyayîşê xo asta tewr cêre reyde zî pare bikerê. Ma bi rêxistinbîyayîşê xo weçînayîşê 31ê adare de ser kewt. Ma do bi heman stratejîye reyna ser bikewê. Naye ra ma vengdayîşê îtîfaqî kenê.

Ma wazenê ke bi hişmendîya xo ya demokrasîyî bêrê têhet vera faşîzm têkoşîn bikerê û nê îqtîdarî bivurnê. Rayîrê naye rêxistinbîyayîş o. Ma seba weçînayîşê verwextî veng da. Coka ma xo nêdê kişte. Her çi ra verî ganî ma pêro komelî heman warê mutabaqatî de bîyarê pêser. Ma do muneqeşa bikerê ke esasê demokrasîyê herêmîyî ser o sîstemo parlamenter senî bêro caardene. Ma do muneqeşa bikerê ke esasê hemwelatîya têdûşte ser o qanûno bingeyî yo demokratîk senî bêro awankerdene.

Ma ganî têkoşînê cinîyan berz bikerê. Ma zanenê ke heta ke cinîyî azad nêbê komel azad nêbeno. Ganî ma têkoşînê demokrasîyê radîkalî bi têkoşînê kede berz bikerê. Ma zanenê ke heta ke kede azad nêba komel zî azad nêbeno."

Hemserekê Verênî yê HDPyî Selahattîn Demirtaşo ke sey esîr yeno tepiştene û wekîlê verênî yê HDPyî Abdullah Zeydanî zî konferansî rê mesajêk erşawit.

Mesajê Demîrtaşî û zeydanî hetê Endamê Meclîsê HDPyî Dogan Erbaşî ra ame wendene.