Tepişteyê dewaya PKK û PAJKî 27ê teşrîna peyêne ra nata seba azadîya Rayberê Şarê Kurdî Abdullah Ocalanî û çareserîya meseleya kurdan grevê vêşanîye de yê.

Zîndanê Kiriklarî yê Buca ra tepişteyanê grevê vêşanîye bi rayîrê avûkatanê xo mesajêk şawit.

Mesajê tepişteyan wina yo:

''Ma 32 tepişteyê Zîndanê Kiriklarî bi coş û moralî tewrê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' bîyî. Ma bi qerardarî çarçewa na hemle de grevê vêşanîye de yê. Wa yar û neyarî bizanê ke Birêz Ocalan seba ma serê her çî de yo. Tirkîya û Rojhelatê Mîyanênî de o garantîya haştî, azadî û demokrasîyî yo. Wa her kes bizano ke Birêz Abdullah Ocalan muxatabê çareserîya meseleya kurdan o.

Seba azadî û estbîyayîşê Birêz Ocalanî ma amade yê ke her metodê çalakîyan bikerê, mesuldarî bigêrê xo ser. No hewte di embazê ma tewrê grevê vêşanîye benê. Ma selahîyetdaranê dewlete û hemkaranê ci rê vanê ke heta ke Birêz Abdullah Ocalan  azad nêbo ma do her metodê çalakîyan meşrû bivînê. Û ma amade yê ke her fedakarîye bikerê. Ma zanenê ke zerrîya keyeyan û şarê ma hetê ma de ya. Ma ancî venga şarê xo danê ke paştdayîşî pîlêr bikerê, bi çalakîyanê cîyayan azadîya Birêz Ocalan û Kurdîstanî hîna nêzdî bikerê.''