Planê îşxalkerdişî yê neweyî yê rejîmê Enqere yê vera Rojawanê Kurdistanî Ewropa de nêzdî ra yenê teqîpkerdene. Nuştoxê rojnameyê  Dîe Zeîtî yê Almanya  Mîchael Thûmannî nuşteyê xo yê peyênî de tehdîtê Serokkomarê Tirkî Recep Tayîp Erdoganî ercnayî.

Nuşteyo ke bi sernameyê ’’Ganî destûrê Efrînêkê diyînî nêro dayene’’ ame nuştene de Thûmann vano ke hêzanê Kurdan Sûrîye de  bi paştdayîşê Amerîka peynîya DAÎŞ’î arde û nika xeylî çeteyê DAÎŞ’î zînanan de yê.Thûmannî bale ante ke Erdogan Kurd û ‘’teror’’ têkişt de şuxulneno û vat rojakewtena Firatî yo  ke dewleta Tirkî bi îşxalî tehdît kena de xeylî multecîyê ke DAÎŞ’î ra remayî estê. Thûmannî îşxalkerdişê Efrînî yê 2018 zî vist vîrî û vat ganî tehdîtanê Erdoganî ser o bêro vindetene.

Thûmannî derheqê qewimîyayîşanê peyênan ê yew serre û nîme yê Efrînî de nê zanayîşî dayî: Goreyê doneyanê Neteweyê Yewbîyayeyî (NY) Efrîn ra 137 hesar kesî mebûr mendê ke bar bikê. Goreyê doneyanê  Banê Çimdarîye yê Heqanê Merdiman ê Sûrîye na hûmare 350 hezarî ra zafêr a. Dezgehê heqanê merdiman ê mîyanneteweyîyî zî vanê ke Efrîn de çimeyê cuya zeytunêrî û çewlîgî yenê vêşnayene û rijnayene. Kurdî bi zor keyeyanê înan ra yenê vetene û herinda înan de Erebî yenê cakerdene. Erdogan hende aver şi ke va Efrîn bajarê Kurdan  nê yê Ereban o.

Erdogan nika wazeno ke multecîyê Erebê ke remayî şiyê rojakewtena Sûrîye înan zî cayê înan ra bikero û 3 mîlyon multecîyê Sûrîyeyijê ke Tirkîye de înan ûca bica bikero. Eke no waştişê Erdoganî bêro ca heman wextî de reseno di hedefanê xo. Hem Tirkîya de multecîyî  bênê tay û hem zî Vakurê Sûrîye de zafêrîya Kurdan qedîyena. Thûmannî  ard ziwanê ke pakkerdişo etnîkî semedê Tirkîya çîyêko xerîb nêyo û qewimîyayîşê Qirkerdişê Ermenîyan û îşxalê Qibrîsî ardî vîrardene.

Mîchael Thûmannî yo ke heman wextî de muxabîrê teberî yê rojnameyî yo Neteweyê Yewbîyayeyî û Yewîya Ewropa ra waşt ke wa Tirkîya û Amerîka yê ke semedê ‘’herêma biasayîşe’’ pêkerde rê nînan bipersê: Do leşkerê Tirkan herêma Kurdan de çikas aver şirê? Amerîkayijî, Tirkî û Kurdî do pîya yewîyanê dewrîye awan bikerê? Amerîka senî vernîya pêkewtişanê mabenê  leşkeranê Tirkîya û mîlîsanê YPG’yî gêna? Tewr muhîmî zî kam eşkeno planê cakerdiş/barkerdişî yê Erdoganî yê vera herêma  Kurdan  vindarno?

Mîchael Thûmannî yo ke heta Serr a 2003’yî sey muxabîrê Rojakewtena Mîyanêne yê Dîe Zeîtî Stanbol de ciwîya nuşteyê xo bi nê vengdayîşî qedîna: ‘’Ganî destûrê Efrînêkê diyînî nêro dayene.’’