Hemserekê ÎHDyî  ard ziwan ke tecrîdê vera Ocalanî yo ke 7ê tebaxa 2019î de newe ra dayîye destpêkerdene vera merdimîye yo û nêno qebulkerdene. Turkdoganî vat: "Vera Ocalanî û hîrê tepişteyanê bînan ê Îmraliyî tecrîd new era dayîye destpêkerdene. Ma sey huqûqnasan bi hawayêkê qetî tecrîd huqûqî nêvînenê.

Nika qanûnêk çin o ke asteng bikero ke avûkatî Ocalan reyde pêvînayîş bikerê. Coka destûrnêdayîşê avûkatan bi temamî keyfî û sîyasî yo.

Ma ge ge Wezaretê Edaletî reyde pêvînayîşan kenê. Ma 15ê çeleyê 2020î de zî Wezîrê Edaletî Abdulhamît Dul reyde pêvînayîşêk kerd. Ma rewşa Îmraliyî rê behs kerd û da zaneyene ke tecrîd vera bêhuqûqî yo. Ma bawer kenê ke Wezaretê Edaletî do seba çareserîye hetkarî bikero.

Abdullah Ocalan tepişteyêko normal nîyo. O seba şarê kurdan merdimêko girîng o û seba Têgêrayîşê Azadîye yê Kurdan rayber o. Mesajê ke o do bido seba meseleyan do bibê çareserîye. Serra 2019î de grevê vêşanîye bi vengdayîşê Ocalanî qedîyayî.

Ez vana qey tewr zaf naye ra nêno destûrdayene ke Ocalan avûkatanê xo reyde pêvînayîş bikero. Çunke Tirkîya de dewlete newe ra babeta mesela kurdan de polîtîkaya biasayîşe xebitnena.Pêkewtişî û şerî hema zî dewam kenê. Coka heta ke na polîtîkaya biasayîşe dewam bikera îqtîdar do mesajanê  haştîye asteng bikera.

Bi îşxalê vera Rojawanî û bi serebûtanê Tirkîya yê vera kurdan mesela kurdan bîye unîversal. Ganî nêro vîrkerdene ke seba çareserîya mesela kurdan Abdullah Ocalan rolêko pîl o. Çunke seba ke şarê kurdî ey sey rayberêk vîneno ey ca nêverdeno. Ganî îqtîdar zî naye baş fam bikero.

Ma sey pawitoxanê heqanê merdiman her tim hetê haştîye de yê û ma do seba ke mesele bi  metodanê haştîyaneyan bêra çarekerdene xîret bikerê. Ma do xîret bikerê ke tecrîd bêro wedarene û dîyalogî newe ra bêrê destpêkerdene."