Wekîlê Partîya Demokratîke ya Şaran  (HDP) vizêrna herêmanê erdlerzî de yê.  Wekîlê ke pîya bi şarî tewrê xebatanê cigêrayîş û xelisnayîşî benê  bajaranê ke tede yê ra qala rewşa peyêne kerde. Parekerdişê hesabê Twîtterî yê Merkezê Pêroyî HDPyî  qala mexdûrîya şarî ameye kerdene û ame vatene ke şar qederê xo rê ameyo caverdayene.

Sancar: Hatay de rijnayîş est o la dewlete çîn a

Hemserekê Pêroyî yê HDPyî Mîthat Sancarî Adana û Hatay de mexdûrê erdlerzî zîyaret kerdî. Hemwelatîyan ard ziwan ke ê qederê xo rê ameyî caverdayene û vera hukmatî hêrsê xo ard ziwan. Sacarî ke tîya qisey kerd vat: ''Tîya rijnayîş est o, dej est o la dewlete çîn a.''

Orhan: Şar keno bi îmkananê xo bixelisîyo

Wekîle Muazzeze Orhana ka qezaya Îslahîye ya Dîlokî de ya, vat: ''Şar bi îmkananê xo cehd keno ke êyê ke binê rijnayîşî de mendê bixelisno. Hema ekîbêk nêameyo. Hetkarîye zaf kêm a. Merdimî bêçare yê. Şar qederê xo rê ameyo caverdayene. Ganî lezabez hetkarîye bêro.''

Bulbul: Selahîyetdarê dewlete, AFAD çew çîn o

Kemal Bulbul zî Semsûr de qisey kerd: ''Ez vizêrna tîya de ya, heta nika mi qet yew cayê rijnayîşî de ne selahîyetdarêkê dewlete ne zî AFAD dîyo. Ne şaredarî ne zî cendirmeyî est ê. Qet hetkarîya dewlete çîn a. Ez tîya ra veng dana paştdayîş hewce keno.  Ganî tewirê hukmatî bêro teşhîrkerdene. Binê bînayan ra veng yeno şar keno bi îmkananê xo înan bixelisno.''

Koç:  Şar xebete rayra beno

Abdullah Koç û Şevîne Coşkun zî Semsûr ra qala rewşa peyêne kerde. Koçî vat:  ''Selahîyetdaranê fermîyan ra çew nêameyo. Şar pê îmkananê xo xebata xelisnayîşî rayra beno.''

Gama ke Koçî qisey kerdêne cinîyêke nameyê şeş kesanê ke binê rijnayîşî de dayî û vat: ''Ez qîraya qîraya. Vat ti şo ma yenê. Me mehf bîyî. Çar kênayê mi şîyî. Çîyo ke ma qala ci bikerê mend?  Yew keyeyî ra şeş kesî şîyî. Çew nêame. Eke biameyêne belka yew xelisîyayêne.''

 Paylan: Vera zeman û serdî têkoşîn est o

Garo Paylan zî Rezanê Amedî ra qisey kerd: ''Keyeyî bi qesawetî pawenê. Her kes hêvî keno ke merdimê înan bêrê xelisnayene. Vera zeman û serdî têkoşîn est o. Seba ke çew bînayanê berzan de nêmaneno krîzê cayêmendişî est o. Amedî ra ver bi bajaranê bînan barkerdiş est o. Ganî cade xeyme û konteynerî bêrê ronayene. Ganî seferberîya hetkarîye her hetî ra bêro xurtkerdene.''

Hatimogullari: Bi hezaran kesî binê rijyayîşî de yê.

Tulaye Hatimogullari zî Hatayî ra qala rewşa peyêne kerde: ''Ez Hatay de Erzinî ra heta Samdagî gêraya mi yew selahîyetdar nêdî. Qet hetkarîyêka merdimî û ekîbêkê cigêrayîşî hema nêresayê tîya.  Nika bi seyan belka bi hezaran kesî binê rijnayîşî de yê. Meridimî tîya ameyî caverdayene, înan rê muameleyê bêkesî yeno kerdene. Merdimî nika bazarê ganî de yê û bêberpirsîyarîya girde est a.''