Xelatê Rojnamegerîye yê Şehîdê Çapemenîya Azade û Mûsa Anterî yê 27'ine  bi merasîmêk ameyî dayene.

Merasîm Merkezê Kulturî yê Cemîl Candaşî yê Şaredarîya Şîşlî de ame viraştene. Parlamenterê HDP û CHP‘yî keyeyê şehîdanê çapemenîya azade, Mayê Şemeyî, Mayê Haştîye, Şaredarê Şîşlî Muammer Keskîn, TJA, DÎK, DÎAY-DER, HDK, EMEP, Platformê Rojnamegeran ê Cinîyan ê Mezopotomya, îdarekarê DHP'yê Stenbolî, Înîsîyatîfê Rojnamegeranê Azadan, lajê Mûsa Anterî Dicle Anter, xebatkarê çapemenîya azade û xeylî kesî tewrê merasîmî bîyî.

Rojnamegerî Kibrîye Everene û Huseyîn Aykol yê ke  sey xeylî rojnamegeranê bînan zîndan de yenê tepiştene mesaj şawitî. Mesajan de ame vatene ke ê do rixmê heme zext û zordarîyan xeta şehîdanê çapemenîya azade de mucadeleyî xurt bikerê.

Dimayê qiseykerdişanî merasîmê xelatdayîşî dest pê kerd. Ajansê Mezopotamya ra Ahmet Kanbalî û rojnameyê BîrGunî ra Huseyîn Şîmşek beşê xebera Tirkî de xelata tewr başe, Euronewsî ra Rabîa Çetîne xelata jûrîyî, beşê Kurdkî de Ajansê Mezopotomya ra Gokhan Altayî xelata xebera tewr başe girewte. Warê fotografan de EPA'yî ra Sedat Sûnayî û Jinnewse ra Rojda Aykine xelate girewte. Warê karîkaturî de zî Aşkın Atrancioglu xelate girewte.