Çalakîya roniştişî ya Amedî ya vera qeyûmanê ke şaredarîyanê Amed, Wan û Mêrdînî de ameyî cakerdene kewte roja 22’ine.

Çalakîya ke Kuçeyê Lîse de ameyî viraştene, xeylî parlamenterê HDP’yî, hemşaredarê Sûr û Farqînî, îdarekarê bajar û qezayan, Mayê Haştîye,  aktîvîstê TJA û xeylî hemwelatijî tewrê ci bîyî. çalakîya ke bi deyîranê cinîyan ê dengbejan dest pêkerde bi eşkrayîye dewam kerde.

Hemsereka HDP’yî Bajarî Hulya Alokmen a ke eşekrayîye de qisey kerd bale ante xoverdayîşê vera qeyûman ser û va: ‘‘Xoverdayîş tena bajaranê ke qeyûm tede amo cakerdene de nêno dayene. No mucadeleyê anorî yê Kurdan o. Her kes zano ke vernîya nê mucadeleyî erwo ra tepîya nêna girewtene.Mucadeleyê ma do heta serkewtiş dewam bikero.‘‘

Abdullah Bozkûşo ke bi nameyê partîyanê ke bi HDP’yî îtîfaq kerdo, qisey kerd, qeyûm  sey hêrişê vera ziwan û kulturê Kurdan hesipna û mesajê girdkerdişê xoverdayîşî dayî.

Selçûk Mizrakliyî zî bi wesîleya serrgêra Yilmaz Guneyî o yad kerd û va: ‘‘Ma do ser bikewê, ma do miheqeq ser bikewê.‘‘

Serekwekîlê Gruba HDP'yî Sarûhan Olûçî zî veng da meclîsî û va:‘‘ Bêrê ma pêro pîya semedê çareserîya meseleya Kurdî komîsyonêk ronê û semedê haştîye gamêk bierzê.  Kam partîya ke nê komîsyon de ca nêgero bizanê ke a haştîye nêwazena.‘‘