Nobeta Demokrasîyî ya Amedî ya ke 19’ê Tebaxe ra nata vera xespkerdişê 3 şaredarîyanê bajaranê pîlan ê HDP’yî yena viraştene roja 20‘ine de ya.

Nebata Demokrasîyî ya ke Kuçeyê Lîse de yena viraştene, bi tewrbîyayîşê palamenter û hemşaredaranê Partîya Şaran a Demokratîke (HDP), îdarekaranê Partîya Eciqnayeyan a Sosyalîste (ESP), Meclîsê Mayanê Haştîye, ameye destpêkerdene. Keyayanê Gezî ra pîyê Alî Îsmaîl Korkmazgîlî Şehab Korkmazgîl, maya Ahmet Atanakî Emsal Atakane, maya Berkîn Elvanî Gulsum Elvane û pîyê ci Samî Elvan, maya Ethem Sarisulukî Sayfî Sarisuluke, maya Medenî Yildirimo ke protestoyanê kalekolê Licê de hetê polîsan ra ame qetilkerdene, Fahrîye Yildirime tewrê çalakîye bîyî.