Serekkomarê Tirkîya Erdogan û Serekdewletê Rûsya Vîlademîr Putîn derheqê meseleya Îdlîbî de Moskova de ameyî têhet û înan bira adirbirnayîşî daye. Hêverî Erdogan û Putîn qasê di saetan û heyetan zî qasê 3 saetan pêvînayîş kerd û dima derheqê adirbirnayîşî de dokumentêko hempar ame wendene.

Wendişê dokumentî ra verî Putînî nê çîyî vatî: ''Destpêkê serre ra nata Îdlîb de xebatê terorî bîyî zêdêr. Seba mergê leşkeranê tirkan ez reyna mesajê xo yê serweşîye dibare kena. Ma terefgîrê serwerî û yewparetîya Sûrîye yê. Ma dokumentêko hempar eşkera kerd. No fokument şer bido vindartene û sivîlan aram bikerê.''

Erdoganî Putînî ra dima qisey kerd û vat ke rejîmo ke da sivîlan ro wazeno Tirkîya bivisno destê xo. Erdoganî vat: ''Noqtayê çimdarîye do adirbirnayîş teqîb bikerê. Seba vergirewtişê hêrişkerîya rejîmî û vindartişê komanê ke adirbirnayîş binpay kenê ma herême de rolêko hîna aktîv girewt.'' Serekkomar Erdoganî seba Îdlîbî statuyêko newe waşt û vat: ''Hêrişê rejîmî yê vera leşkeranê ma ra dima mecbur o ke Îdlîb de statuyêko newe bêro awankerdene. Adirbirnayîşî na şewe ra dima do dest pêbikero. Seba ke adirbirnayîş bibo herdemî xebatê ma do dewam bikerê.''

Dokumentê hemparî yê adirbirnayîşî de ke hetê Wezîrê Karanê Teberî yê Rusya Sergey Lavrovî ra û hetê Wezîrê Karanê Teberî yê Tirkîya Mevlut Çavuşogluyî ra ame wendene nê îfadeyî ca gênê:

-Seraserê xeta ke nakokîyê Herêmanê Kêmkerdişê Alozîya Îdlîbî de pêro têgêrayîşê leşkerî 6ê adara 2020î saete 00:01î ra dima do vinderê.

-Vakurê rayîrê Heleb-Lazikîyê (M4) de 6 kîlometreyî û başûrê ci de 6 kîlometreyî korîdorêkê asayîşî do bêro awankerdene. Mabênê 7 rojan de nê birê esasî do bêrê zelalkerdene.

-Dewrîyeyê rûsan û tirkan do 15ê adare de rayîrê M4î de Trumbî ra heta Eyn ek Hawarî dest pê bikerê.