Şefê beşê weşîya domanan ê Wezaretê Weşîye yê Îranî Muhammed Haydarîyî da zanayene ke Îran de rîyê feqîrîye ra her hezar pitikan ra 8.27ê înan mirenê. No zî yeno na mana ke 1.4 mîlyonî pitikê ke serrêk de yenê dinya ra 10 hezarê înan mirenê.
Goreyê ajansê fermî yê IRNA Îran de rîyê feqîrîye ra serre de 10 hezarî pitikî mirenê.
Haydarîyo ke ajansê fermî yê IRNA rê qisey kerd vat zafê merdişan başûr-rojakewtena eyaletê Sîstan-Belûcistanî, başûrê eyaletê Hurmuzganî, rojawanê eyaletê Kîrmaşanî (eyaletê rojakewtena Kurdistanî) û başûr-rojakewtena eyaletê Kermanî de virazênê.
Hayîdarîyî vat: “Nê eyaletan de rîyê kemîbîyayîşê zanayîşê weşîye, feqîrî û bêdîqetîya verê ardişê pitikî domanê ke yenê dinya cuya xo vîndî kenê.”
Îran de sînorê feqîrîye seba keyeyêkê çar kesan sey 28 mîlyon rîyalî ameyo bewlîkerdene ke no zî pîyasaya serbeste de teqabulê 233 dolarê Amerîkanî keno.
Goreyê raporê Merkezê Cigêrayîşan ê Meclîsê Îranî wareyê bejikî zî hendî sey şaristanan krîzî ra mutesîr benê û feqîrî ê doran de zî bîya zaf. Ancî goreyê raporî eyaletê Sîstan-Belûcistan û yê Kermanî eylatê tewr feqîrî yê welatî yê.
Derheqê feqîrîye de îstatîstîkê cîya cîyayî dîyenê. Goreyê doneyanê fermîyan nisbetê feqîran se ra 35 o. La temsîlkarêkê eyaletê Kurdistanî Şahab Naderîyî 11ê Adare de eşkerayîyêk dabî û vatibi ke Îran de se ra 80ê şarî feqîr o.
Îran de seba şer û sîlehan xeylî pereyî yenê xerckerdene la problemê perwerde, kar, ekolojî, heqê kemhûmaran û dizdîye roj bi roje hîna benê zaf. Welat de hetêk ra feqîrî û hetêna ra zî problemê ziwayîye esto. Goreyê raporê bêkarîye nisbetê bêkarîye se ra 15 ra vîyart. Goreyê doneyanê peyênan ê Wezaretê Xebate yê Îranî bêkarîya cinîyan hewt serranê peyênan de se ra 25 bî zêde.
Goreyê xeberêka ajansê xeberan ê IRNA ya ke menga Teşrîna verêne de amî weşanayene Îran de 2 mîlyonî karkerê domanî estê.
