Dima ke dîmenê şîdetê polîsanê Îranî ameyî vilakerdene derheqê polîsan de tehqîqat dîya destpêkerdene.

Dîmenan de aseno ke polîsêkê bi motorsîklete bi şîdetî kesêk visneno erdî û dano piro. Nêzdîyê des polîsî zî nê şîdetî seyr kenê. Dîmenan de çend helan ra dima vengê çeke yeno û polîsî pê motorsîkletan nê kesî ser ra şinê. Polîsî dima şinê û cenaza zî werte de verdenê. Dîmenî medyaya dîjîtale de ameyî vilakerdene. Naye ra dima ajansê fermî yê Îranî de dîya zanayene ke derheqê nê polîsan de tehqîqatêk dîyayo destpêkerdene.

Îran û Rojhelatê Kurdîstanî de mengêke ra zêdeyêr o çalakîyê protestoyî dewam kenê. Goreyê çimeyanê rêxistinanê heqanê merdiman û muxalîfan heta nika mabênê 200-480 de kesî kişîyayê û bi des hezaran kesî zî ameyê destbendkerdene.