Îran û Rojhelatê Kurdîstanî de qetilkerdişê Jîna Emînî ra nata çalakîyê şaran dewam kenê.

Şaristanê Tehranî yê Îranî de vizêr şan Fermandarê Merkezê Besîcî Kasim Fethulayî keyeyê xo de ame kiştene.

Serekkomarê Îranî Îbrahîm Reîsîyî zî televîzyonan de gef wend ke ê do serrgêra 3. ya kişîyayîşê ci de qesasê Qasim Suleymanîyî bigêrê.

Şaristanê Sine yê Rojhelatê Kurdîstanî de ciwanan pê öolotofan dezgehê propagandayê dewlete vêşnayî. Seqiz de ciwanan seba paştdayîşî keyeyê Milad Ebadîyo ke amebi destbendkerdene zîyaret kerd.

Şaristanê Ciwanroyî yê Rojhelatê Kurdîstanî de seba 7 kesanê ke ameyê qetilkerdene merasîmî ameyî kerdene la hêzanê Îranî hêrişê şarî kerd. Hêzan eşt keyeyan ser û xeylêk kesî destbend kerdî.

Dîya zanayene ke zîndanê Keçoyî yê Tehranî de hunermendê kurdî Îlham Murerîsîyî dest pê grevê vêşanîye kerdo. Nuştoxo kurd Mujger Kawusî zî bi bedelê kefaletî vera dîya.

Çalakîker Mehdî Eşkîzerî raştê îşkenceyanê giranan ame, 20 rojan nezaret de mend û yewşeme dinyaya xo bedilnaye.

Goreyê Rêxistina Heqanê Merdiman a Îranî çalakîyan de heta nika 516 kesî ameyî qetilkerdene û 19 hezar 204 kesî zî ameyê destbendkerdene.

Goreyê aktîvîstanê heqanê merdiman ê HRANA 16ê êlule ra nata 70ê ci serra 18î ra qijêr 516 kesî ameyê qetilkerdene û 19 hezar û 204 kesî zî ameyî destbendkerdene. Goreyê HRANA çalakîyî 161 şaristanan rê vila bîyê.

Rêxistina Heqanê Merdiman a Îranî (IHR) zî pare kerd ke 16ê êlule ra heta 27ê kanûne 64ê ci domanî, 34ê ci cinîyî 476 çalakîkerî ameyê qetilkerdene û 100 çalakîkeranê tepişteyan ser o zî gefê dardekerdişî est ê.