Serekanê Amerîka û Misirî dîyar kerd ke hetkarîya merdimatîye ya filîstînijan Şerîdê Gazze de vindarte yê û beno ke Misir berê Refahî abikero. Misirî roja pancşemeyî îlan kerd ke înan Sînorê Refahî de destûr dayo hetkarîya merdimatîye ya mende derbazê Şerîdê Gazze biba.

Bi seyan kamyonê hetkarîye verê beranê herêma Filîstînî de parkkerde yê.

9ê teşrîna verêne ra nata Gazze binê ablûqaya Îsraîlî de ya ke nêzdîyê 2.4 mîlyon roniştoxê Gazze tede ceyran, awe û werdî ra bêpare yê. 17ê teşrîna verêne de Îsraîlî hêrişê nêweşxaneyê Gazze kerdbi û goreyê selahîyetdaranê Filîstînî tîya de tewr tay 500 kesî merdê. Îsraîlî îdîa kerd ke hêriş hetê Cîhadê Îslamî yê Hamasî ra ameyo kerdene.

Serekê Amerîka Joe Bidenî Tel Aviv zîyare kerd û îdîa kerd ke Îsraîlî hêrişê nêweşxaneyî nêkerdo.

Goreyê eşkerayîya Wezîrîya Weşîye ya Filîstînî hêrişanê Îsraîlî de Gazze de tewr tay 3 hezar û 500 kesî merdê, 12 hezar kesî birîndar bîyê. Goreyê agahîyan qasê 1400 îsraîlijî zî merdê ke nînan ra 286 kesî leşker ê.

Wezîrê Pawitişî yê Îsraîlî Benny Gantzî roja çarşemeyî eşkerayîyêke daye û vat: ''Beno ke şer bi mengan hema dewam bikero. Newera awankerdiş zî beno ke bi serran dewam bikero. Armancê ma teyna çinkerdişê Hamasî yo.''