Wezîrê Karanê Zereyî yê Almanya Horst Sehoferî da pêhesnayene ke ê do derheqê parbekerdişê multecîyanê ke ameyê Îtalya gamêk bierzê. Seehoferî ard ziwan ke ê do her çar multecîyan ra yewe/î yê ke serê deryayî ra ameyê Îtalya qebul bikê û qebulkerdişê nê multecîyan do sîyasetê Almanya yê multecîyan rê tesîr nêkero.

Mîyanê 8 aşmanê emserî de nezdîya 9 hezar multecîyî pê rayîrê deryayî ameyê Îtalya, qerarê girewtişê lîmanan hema zî muteber o ke wextê Wezîrê Karanê Zereyî yo çepgir Matteo Salvinî de ame dayene. Yeno texmînkerdene ke Gîûseppe Conteyo ke Salvînî ra pey hukmatê neweyî yê koalîsyonî de bîyo serekwezîr, do no qerarî bibedelno.

Îtalya Çareserîya Mendeye Wazena

Herçiqas pêşnîyaza Almanya wina bî zî Îtalya derheqê perekerdişê multecîyan de çareserîyêka mendeye û mutlaqe wazena. Serekwezîr Conte wazeno ke her yew keştîya multecîyan pê muzakereyanê cîyayan nêrê parekerdene. Ganî multecîyî mîyanê welatanê  Yewîya Ewropa de bêrê parbekerdene.Yeno fikirîyayene ke welatê Yewîya Ewropa 23'ê Êlule de Brukselî de seba parekerdişê multecîyan do bêrê pêser.