Semedê halê nikayênî yê Yemenî ke hetê Miletanê Yewbîyayeyan (MY) ra sey ‘krîzo tewr pîl ê merdimayî’ ame îlankerdene bi desan sazîyanê hetkarî veng da ke seba cuya bi mîlyonan merdiman bêro xelesnayene wa pêkewtişî vinderê.
Yemen de serra 2015î ra nata rîyê şerê mîyanênî ra ke dewletê herême zî tewrê ci bîyê tewr tay 14 mîlyon merdim tehlukeyê vêşanîye dir têrî mendo.
Sazîyê sey Care International, Oxfam, Federasyonê Heqanê Merdiman yo Mîyanneteweyî (FIDH), Action Contre la Faim, Organîzasyonê Doktorê ke Sînor Nas Nêkenê (MSF) û xeylî sazîyê Yemenijî zî tede 35 sazîyanê komelî yê sivîlan eşkerayîyêka hempare vila kerde.
Eşkerayîye de ame vatene welato ke nufûsa ci 28 mîlyonî ya tera 14 mîlyonê ci binê tehlukeyê vêşanîye de yê û na yewe ra ganî pêkewtişî bilez bêrê vindartene.
BERPIRSÎYARÎYA ROTIŞÊ SÎLEHAN Ê NÊ HALÎ DE AMÎ BI VÎRARDENE
Eşkerayîye de veng dîya hukmatanê herême û yê dinya ke her tewir rotişê sîlehan ê ke şerê Yemenî de yenê şuxulnayene bidê vindarnayene.
Bitaybetî veng dîya Erebîstan û Emîrîyanê Yewbîyayeyan ê Ereban ke bi berpisîyarî têbigêrê û rotişê sîlehan vindarnê.
Heman wextî de eşkerayîye de ame vatene ke her tewir qirkerdişê sivîlan û îxlalkerdişê hewanê merdiman bi hawayêkê qethîyî bêrê vindartene.
Eşkerayîye de ame vatene ke krîzo ke Yemen de yo krîzêkê afatê xozayî nêyo, ganî sînorkerdişê ke arîyayê vernîya xida, sotemenî, malzemeyê tibî û hetkarîyanê bînan bilez bêrê wedartene.
