Baregehê El Vattîye yo ke dewleta tirke wazena Lîbya de xo rê bikera baregehêkê mendeyî, vizêr şan hetê 'teyarayanê nêzanîyeyan' ra dîya bombayan ver. Bombarduman zîyaretê Hulusî Akarî ra dima ame kerdene.
Dewleta tirke pê gonî û xeyalanê xo yê Osmanijê neweyî Lîbya de krîz kena giranêr. Dima ke Wezîrê Pawitişî yê Tirkîya Hulusî Akarî Lîbya zîyaret kerd vizêr şan Baregehê El Vattîye hetê 'teyarayanê nêzanîyeyan' ra dîya bombayan ver. Artêşa Neteweyîye ya Lîbya ya pabesteya General Hafterî da zanayene ke înan da baregehî ro û hêriş de 4 leşkerê tirkî kişîyayî. Tay çimeyan zî îfade kerd ke 3 leşkerê tirkî kişîyayî. Reyna yeno vatene ke Sîstemê Pawitişê Hewayî yo ke artêşa tirke baregeh de ca kerdbi, ame îmhakerdene.
Baregehê El Vattiye paytext Trablus de yo. 18ê gulane de baregeh pê hetkarîya artêşa tirke hetê cerhanê Hukmatê Mutabaqatê Neteweyî (HMN) ra amebi îşxalkerdene. Dewleta tirke seba ke baregeh bikera baregehêkê xo yê mendeyî serekê Fayîz El Serracî HMNyî reyde pêvînayîşan kena.
Balkêş o ke zîyaretê Hulusî Akarî ra dima baregeh dîya bombayan ver.
Akarî derheqê Lîbya de verê cû eşkerayîyêka winasêne dabi: ''Ma do heta peynîye uja de bibê (...) Wezîfeyê ma yo ke ma uja de perwerdeyê leşkerî û şêwirmendîye rê hetkarî bikerê.''
Berpirsanê Artêşa Neteweyîye ya Lîbya ra Xalid El Mehcûbî televîzyonê Sky News Araba de qisey kerd û vera vatişanê Akarî nêrazîbîyayîşê xo mojna.
El Mehcûbî vat: ''Tirkî xeyal kenê ke sey Osmanijan Lîbya de bimanê la dinya de cayê nê xeyalî çin o. Tirkî wa Lîbya ra xo biancê.''
