Hetkarê Wezîrê Karanê Teberî yê Sûrîye Caferîyî vat Sûrîye de pê destê cerganê DAÎŞî dizdîya petrolî û gazê sarinî hetê lahê Erdoganî ra ameye kerdene û MÎTî zî gazê sarinî Lîbya ra berd Sûrîye.
Hetkarê Wezîrê Karanê Teberî yê Sûrîye Caferîyî Ajansê DWyî rê qisey kerd û îtîrafê Sedar Pekerî raşt kerdî.
Caferîyî bale ante ser ke destê înan de derheqê dizdîya hukmatê Erdoganî ya Sûrîye de dokumentî estê û vat: ''Ma 108 nameyê nimiteyî Konseya Ewropa, Sekeretereyê Pêroyî yê Neteweyanê Yewbîyayeyan rê erşawitî. Erdoganî bi hezaran terorîstî ardî Sûrîye. Çîyê ke Sedat Pekerî îtîraf kerdê raşt ê. Rejîmê Erdoganî û keyeyê Erdoganî Sûrîye ra petrol, çimeyê gazî, madenî pê destê DAÎŞî diznayî.''
Caferîyî da zanayene ke hukmatê Tirkîya tay komanê Sûrîye reyde têkilîye ronaye û mîsalê ney zî Heysem Topalca yo ke Tirkîya de sey 'Heysem El Kassarî' şinasîyeno û ajanê MÎTî yo. Caferîyî pare kerd ke Heysemî Lîbya ra gazê sarinî dizna û berd Îstanbulî.
Caferîyî vat: ''No şexs Dîlokî ra kewt sînorê ma. Nê şexsî di lître gazê sarinî da Cepheyê El Nûsrayî û no gaz pê konvoyê hetkarîya merdiman ard. No kes 2021 de qezayê trafîkî de merd. Tirkîya erdê Sûrîye îşxal kerd. Tirkîya Sûrîye de nameyê dibistan, meydan û kuçeyan kerdî tirkî, alaya xo darde kerde, maden û endustrîyê ma diznayî.''
