Meclîsê Partî yê Partîya Herêmanê Demokratîkan (DBP) encamnameyê kombîyayîşê xo yê ke 14-15ê hezîrane de Amed de ame kerdene, eşkera kerd.

Encamname de nê ameyî vatene: “Çareserîya demokratîke ya meseleya kurdan têna ameyoxê kurdan ney, ameyoxê heme şaranê Tirkîya û Rojhelatê Mîyanênî bewlî keno. Vera sîstemê şerî, ma kiriştoxê haştîye û azadîye yê. Cinîyê înşayê komelê demokratîkî de hêzêko ronayox ê. Komelo ehleqî û polîtîk serkêşîya cinîyan de beno. Demê winayênî de ke sîstemî her hetî ra poltîkayê xo yê şerî fînayî dewre, cedh keno ke komelî erjanê ci ra bikero, têkoşînê cinîyan o rêxistinkerde rayîrê newera înşakerdişê nê erjan û komelkerdişî yo. Coka cinîyî têna xoverdayox nîyê, eynî wextî de hêzo wayîrê qale û bedilnayox o. Ma sey cinîyan ê kurdan do her ca de wayîrê Vengdayîşê Haştîye û Komelê Demokratîkî yê Birêz Ocalanî bivejê.

Sûrîye de hukmatê demdemî vera kurdan polîtîkayanê zextî rayra beno la kurdî hinî Rojhelatê Mîyanênî de têna şarêk ney, eynî wextî de înşayê sîstemêkê demokratîke de rolê ci yo sîyasî û komelkî gird o. Na raştîya newî denkleme herêmkî de rolê şarê kurdî dahîna fîneno çiman ver û dahîna hêzdar keno. Îhtîmalo ke hêzo hegemon o newe yê Rojhelatê Mîyanênî Îsraîl bo. No zî do dengeyanê neweyan ê hêzê herêmkî newera bewlî bikero. Nê bedilnayîşê hêzî de zaf muhîm o ke kurdî têna pawitiş ney, eynî wextî de xeta polîtîke bimanê.

Komel dewlete ra paweno ke derheqê prosesî de gama pête bierzo. Bitaybetî merhaleyêka herême badê 27ê sibate kewte de, hinî mojnena ameyo sînorê polîtîkayanê asayîşî û mecbûrîya çareserîya demokratîke fîneno çiman ver. Meseleya kurdan têna çarçeweya demokatîkbîyayîşî de yena çareserkerdene. Na têna meseleya kurdan nîya pêro komelê Tirkîya eleqedar kena. Na nuqta de berpirsîyarîya partîyanê sîyasîyan û dezgehanê demokratîkan pîl a. Prosesê Haştîye û Komelê Demokratîkî têna dîyalogêk nîyo, gerek sey hemleya demokratîkbîyayîşî bêro destgirewtene. Partîyê sîyasîyî gerek proses de aktîf ca bîgîrê. Haştîye têna bêvengkerdişê çekan ney, cuya bianore, seyyewbîne û azade ya şaran gena binê temînatî. Bi qala kilme nê wextî de ke ameyoxê Rojhelatê Mîyanênî newe ra yeno nuştene, şarê kurdî zî babeta tayînkerdişê ameyoxê xo de ameyo bertengêko tarîxî. Semedê çareserîya demokratîke û haştîye komelkî têgêrayîşêko xurt ê şarî û têkoşîno qerardar hewce keno. Dewlete zî gerek cade berpirsîyarîya xo bîyaro ca. Çareserîya demokratîke ya meseleya kurdan têna ameyoxê kurdan ney, ameyoxê heme şaranê Tirkîya û Rojhelatê Mîyanênî bewlî keno. Coka gerek her kes berpirsîyarîya xo bîyaro ca ke. "