Nêrazîbîyayîşê rêxistinanê komelê sivîlî ra dima Frontexo ke kontrolê sînoran ê teberan ê Yewîya Ewropa ra berpirsîyar o, sibeyê dişemeyî da zanayene ke teyarayêke sena cigêrayîşî do biperra.

Goreyê Frontexî keştîya ke qala ci yena kerdene, çar ketîyan ra yew a ke roja îneyî û şemeyî ameye tesbîtkerdene. Frontexî eşkera kerd ke na babete de înan zanayîş da Îtalya, Malta, Lîbya û Tunus. Rêxistina sivîle ya almanan Sea-Watchî verê cû îfade kerdbi ke nê çar keştîyan ra yewe cum bîye. Dezgehî vat: ''Hayîya pêro selahîyetdaran pê rewşe esta labelê înan ra yewî zî hetkarîye nêkerde. Destûr da ke merdimî bimirê.''

Sea-Watchî roja şemeyî hîşyar kerdbi ke botêko pastîkên tengasî de yo. Zanayîş ame dayene ke bot de 260 koçberî estê. Selahîyetdaranê Malta û yewinanê asayîşî yê Îtalya derheqê babete de eşkerayîye nêdaye.

Komîseta Berze ya Multecîyan a Neteweyanê Yewbîyayeyan (UNHCR) û Rêxistina Koçî ya Mîyanneteweyîye qesawetê xo ardî ziwan. Vervatoxa UNHCRyî ya Îtalya Carlotta Samî vat: ''Ma zaf qerqilîyenê. Ma hema zî selahîyetdaran ra xeberêke nêgirewte ke keştîye cum bîya yan nê.''