Serranê 1990an ra nata Dengizê Sipî de bi hezaran koçberî merdî. Rîyê vîrusê Korona ra Îtalya Dengizê Sipî de dest na keştîyanê xelisnayîşî yê peyênan ser. Îtalya pê bahaneya 'meseleyanê teknîkan' dest na keştîya bi nameyê 'Sea-Eye' ya Almanya û keştîya bi nameyê 'Aita Marî' ya Welatê Baskî ser.Nika dengiz de qet yew xebata xelisnayîşî nêna kerdene.

Goreyê Temsîlkarê Taybetî yê Komîserîya Berze ya Koçberan a Neteweyanê Yewbîyayeyan (UNHCR) Vincent Cochetelî pê tesîrê vîrusê Korona xeylêk multecîyî seba şîyayîşê Ewropa do xîret bikerê. Cochetelî ard ziwan ke rîyê şaran ra koçberî do zêdêr verê xo bidê Ewropa û têna emser Lîbya de se ra 290, Tunus de se ra 156 koçî zêdîyayî. Welatanê Afrîka de zî na hûmare zêdîyena.

Destsernayîşê Îtalya ra dima trajedîyê ke do Dengizê Sipî de biqewimîyê bi hawayêkê bêvengî bêrê dîyene.

Dîrektora Rêxistina Hetkarîye SOS Méditerranée Sophie Beau derheqê babete de qisey kerd û na polîtîkaya Ewropa rexne kerde. Beau vat: ''Semedo ke hînî qet şahîd çin o ma nêeşkenê tesîranê nê trajedîyan bizanê.''

Tewr peyên destpêkê emserî de 79 koçberan ra têna tayê ci resayî qeraxê Îtalya. Reyna yeno vatene ke artêş û hukmatê Malta Dengizê Sipî de hetkarîya koçberan nêkenê û benê sebebê merganê înan.