Dengizê Sipîyî de têna 10 serranê peyênan de tewr tay 20 hezar multecîyî merdî. Karê bazirganîya merdiman pê dîyayîşê wisarî zêdîyeno. Labelê seba ke sînorê Îtalya û Malta semedê vîrusê Korona ra girewte yê, zanayîşê mergê multecîyan zî zêdîyenê.

Goreyê eşkerayîya Komîserîya Berze ya Multecîyan a Neteweyanê Yewbîyayeyan (UNHCR) tewr tay 5 multecîyî Lîbya ra kewtî rayîr û Dengizê Sipîyî de xeniqîyayî. Goreyê eşkerayîye,cinîyî û domanî zî tede 51 multecîyî keştîyêka bazirganîye ra ameyî xelisnayene. Ame parekerdene ke multecîyî wezîfedaranê asayîşê qeraxî yê Lîbya rê ameyî teslîmkerdene û paytext Trablus de sewqê merkezê komkerdişî ameyî kerdene.

Yeno texmînkerdene ke hûmara koçberanê ke Lîbya ra kewenê rayîr zêdîyena. Îtalya û Malta semedê vîrusê Korona ra sînorê xo yê dengizî girewtî coka qesawet zêde yo. Lîbya de ke serra 2011î de şerê zereyî dest pêkerd û hema zî dewam keno, vurîya merkezê cerganê ke merdiman remnenê Ewropa.

Goreyê doneyanê Rêxistina Koçî ya Mîyanneteweyîye (IOM) mabênê serranê 2014î û 2018î de nêzdîyê 17 hezar multecîyî Dengizê Sipîyî de merdî. Labelê na hûmare têna kesanê xelisîyayeyan ra yena meydan. Yeno zanayene ke zaf serebûtê cumbîyayîşê bot û keştîye nêameyî qeydkerdene.