Dewaya Stuttgartî: Ma kurd bîyî û coka nêeşkayî bêveng bimanê

Veysel S.yo ke waştişname da dewaya ke sîyasetmedarê kurdî Stuttgart de yenê hukmkerdene, vat: ''Ez sey yew kurd nêeşka vera hêrişanê barbaran bêveng bimana.''

Şaristanê Stuttgartî yê Almanya de 5 kurdî yenê hukmkerdene û  roniştişê 67. yê dewaya înan roja îneyî ame kerdene. 5 kurdan ra 3 kesî bi hawayêkê tepişteyî Zîndanê Stammheimî de yenê hukmkerdene.

Dewa de Veysel S., Agît K. û Ozkan T. bi hawayêkê tepişteyî  û Cîhan A. û Evrîm A. zî bi hawayêkê veradîyayeyî yenê hukmkerdene.

Goreyê xebera Yenî Ozgur Politika roniştişanê verênan de derheqê kerdişanê faşîstkîyan ê Tirkîya û têkilîyanê TC-DAÎŞî de waştişnameyî ameybî dayene.

Veysel S. waştişnameyê xo yê 20 rîpelan de Osmanijan ra heta nika bale ante qirkerdişanê Tirkîya yê vera kurdan.

Veysel S. waştişnameyê xo de pare kerd ke heta ronayîşê PKKyî yê bi rayberîya Rayberê Şarê Kurdî Abdullah Ocalanî kurdî bêrêxistin ameybî veradayene û tersnayene.

Veyselî eşkera kerd de dewleta tirke seba ke terorê vera kurdan mîyan bikera PKK sey 'rêxistina terorî' îlan kerde û tay dewletê bînî zî seba menfaatanê xo PKK û Têgêrayîşê Azadîye yê Kurdan rê vanê terorîst.

Veysel S. da zanayene ke sey yew kurd o nêeşkayo vera hêrişanê dewlete bêveng bimano û qasê îmkananê xo seba azadîye têkoşîn kerd. Veyselî vat: ''Ez kamca de biba zî domanê Kurdîstanî ya. Hîkayeya kurdan a ke ez xîret kena qala ci bikera, hîkayeya min a zî û na hîkaye cuya mi û têgêrayîşanê mi kifş kena.''

Evrîm A. zî waştişnameyê xo de vat a terorê dewleta tirke ra neçare menda ke welatê xo biterikna, ameya Almanya la dî ke yew ferqê Almanya Tirkîya ra çin o.''

Roniştiş taloqê 5ê teşrîna peyêne bi.