Dewleta tirke ya îşxalkere Efrînî ra dima Lîbya de zî dest pê kendişê goristanan kerd. Dewleta tirke semedo ke reqîbanê xo qels bikera kewte mîyanê cigêrayîşê 'gorê komkî' û cenazayan hesabanê xo yê sîyasîyan rê kena çeke.
Goreyê xebera Camerron Magazine dewleta tirke 'gorê komkî' şaristananê Lîbya de dîyî. Goreyê çimeyan hêzê tirkî rayberîya general Îlkay Altindagî de doneyan kom kenê û şaristananê Geryan, Tarhûna û Nasna cenazayan kom kenê.
Goreyê çimeyan armancê dewleta tirke o yo ke pê 'gorê komkî' şefê Artêşa Neteweyî ya Lîbya Xelîfe Hefer sûcdar bikera.
Çimeyî vanê dewleta tirke wazena bi nê hawayî Hefterî, mutefîqanê ci û muxalîfan qels bikera.
Serra vîyarte zî Hukmatê Mutabaqatê Neteweyî pê paştdayîşê Tirkîya Tarhuna de dest pê cigêrayîşê gorê komkî kerdbi. Dima ke bi desan cenazayî ameyî dîyene hukmatê Trablusî Xelîfe Hefterî sûcdar kerdbi ke herêmanê xo de cînayetan keno û sivîlan rê îşkence kerdo. La na herême de cara milîsê El Kanîyatî estbîyî.
Dewleta tirke temmuze de zî Efrîn de goristanê şerwananê YPG, YPJ û QSDyî xera kerd, cenazayî remnayî û no goristan medyaya xo de sey gorê komkî mojna.
