Wezîrê Karanê Teberî yê DYA Mike Pompeoyî pare kerd ke ey Serekkomarê Qibrisî Nicos Anastasiadesî reyde telefon de qisey kerd û bire daye ke ekîpê leşkerî Qibrisî rê bêrê rotene. 

Pompeoyî vat ke tay beşê ke rotişê çekan asteng kerdêne budçeyê 2012î de wedarîyayî. Kongreya Amerîka zî menga peyêne de tesdîqêko winasên kerdbi.

Dima ke dewleta tirke serra 1974î de vakurê Qibrisî îşxal kerd îdareyê DYA serra 1987î de seba ke cesaret bida yewbîyayîşê Qibrisî ambargoyê çekan ardbi ca.

Senatorê Demokratî Bob Menendezî seba bire kêfweşîya xo arde ziwan û vat: ''Na seba Qibrisî gama girîng a. Qibris hemkaro pêbawer û stratejîk o.''

Dewleta tirke bire şermezar kerde û waşt ke apey gamêke zî nêra eştene.

Pompeoyî da zanayene ke DYA do paştî bida Qibris. Pompeoyî menga temmuze de ardbi ziwan ke ganî têkilîya bi Qibrisî bêra zixmkerdene.

Na bire wextêkê winasênî de ke dewleta tirke binê nameyê 'cigêrayîşê gazî' de Dengizê Sipî de alozîyan virazena.