Ajansê Afetê Neteweyî yê Endonezya da zanayene ke xebatê cigêrayîş û xelisnayîşî 12ê Teşrîna verêne de qedîyayî la cigêrayîşê merdimanê vîndîbîyayîyan  dewam  keno. Hema binê enqazan ra bedenê bêganî yenê vetene.

Eşkerayî de ame vatene ke herême de heta nika 223 hezar û 751 kesan cayê xo bedilna û 309 kesî zî hema vîndîbîyaye yê.

Dezgehê Cigêrayîşanê Jeolojîkan ê Amerîka (USGS) 28ê Êlule de dabi zanayene ke Girava Sûlawesî ya vakurê Endonezya de  şîdetê 7.5î de erdlerz virazîyayo. Erdlerzî ra dima zî bajaranê Dongala û Palû de tûsûnamî vîrazîyabi.