Bi mabênçîyîya Tirkîya û Rûsya roja dişemeyî Moskova de muzakere amebi kerdene la netîce nêame destvistene.

Şefê hukmatê Trablusî Fayez El Sarac û Hafter roja dişemeyî şîbî Moskova.

Goreyê televîzyonê El Arabîya yê Dubaî Hafterî semedê Tirkîya ra adirbirnayîş îmza nêkerd. Ame parekerdene ke seba ke adirbirnayîş nêkeno ke Tirkîya leşkeranê xo Lîbya ra tepîya bianca û peymana mabênê Trablusî û Anqara batal nêkero Hafterî adirbirnayîş îmza nêkerd.

Vervatoxa Wezaretê Karanê Teberî yê Rûsya Maria Zaharova zî da zanayene je Hafterî verî ke peymana adirbirnayîşî bêra îmzakerdene masa ra werişt.

Dima ke serra 2011î de rejîmê Muhammed Kaddafîyî hetê NATOyî ra amebi çinkerdene Lîbya de alozîye dest pêkerd. Rojhelatê Lîbya destê Halîfe Hafterî de rojawanê ci zî destê hukmatê Yewîya Neteweyîye de yo. 

Helîfe Hafterî nîsana 2019î de Trablus vist destê xo. Hewteyêkî ra verî zî şaristano stratejîk Sîrte kewt destê Hafterî.

Dewleta tirke menga teşrîna peyêne de hukmatê Trablusî reyde peymanêke kerde û tezkere qebul kerdç Tirkîya bi na peymana dengizî wazena ke gazê Dengizê Sipî bivisna destî.

Dewleta tirke ambargoyê çekan ê Neteweyanê Yewbîyayeyan bin pay kerd û çek û cebilxaneyî erşawitî Birayanê Misilmanan ê Trablusî. Tirkîya cergê DAÎŞî û El Nusrayî zî erşawitî Lîbya. 

Halîfe Haftarî zî 3ê çeleyî de televîzyonê El Hadatî de qisey kerd û vera mudaxeleyê Tirkîya venga seferberîye û cîhadî kerd.

Warê mendebîyayîşê adirbirnayîşê Lîbya de gumanê pîlî estê. Naye ra yew zî garantora adirbirnayîşî dewleta tirke ya îşxalkere ya. Na zî çareserîye kena kêm.